काठमाडौ । विश्व ऋण परिषद (WOCCU) को व्यवस्थापन तथा अष्ट्रेलियन बचत तथा ऋण सहकारी संस्था (म्युचुअल बैंक), सिड्नीको आयोजनामा बचत तथा ऋण सहकारी संस्थाहरूको संस्थागत विकास, जोखिम सुपरिवेक्षण तथा प्राविधिक सुरक्षासम्बन्धी दुईदिने कार्यशाला श्रावण ७ गते बाट सुरु भएको छ ।

विशेषगरी एशिया र अफ्रिकाका बचत तथा ऋण सहकारी (साकोस) हरूलाई लक्षित गरी आयोजित कार्यशालामा अफ्रिकाका प्रारम्भिक संस्था तथा केन्द्रीय संघहरूबाट २३ जना र नेपालबाट ३ जना प्रतिनिधिको सहभागिता रहेको छ ।

कार्यशालामा विश्व ऋण परिषदका सदस्य सेवा निर्देशक थोमस बेलेक्भिच तथा म्युचुअल बैंकका प्रमुख कार्यकारी अधिकृत मार्क ओर्थिङ्गटनले सहजीकरण गरिरहनु भएको छ । कार्यक्रम सिड्नी स्थित म्युचुअल बैंकको कार्यालय बकिंगहम् ५९ मा सञ्चालन भइरहेको छ ।

नेपालका तर्फबाट नेफ्स्कूनका अध्यक्ष चन्द्रप्रसाद ढकाल, प्रमुख कार्यकारी अधिकृत शिवजी सापकोटा तथा चन्द्रागिरि बचत तथा ऋण सहकारी संस्थाका प्रमुख कार्यकारी अधिकृत कृष्णकुमार श्रेष्ठको सहभागीता रहेको छ ।  

कार्यशालामा सहकारी क्षेत्रको प्रभावकारी सुपरिवेक्षण, जोखिम न्यूनीकरण, गुणस्तरीय सेवा प्रवाहका लागि एकीकरण तथा केन्द्रीय संघहरूको दिगोपनाका विषयमा विस्तृत छलफल गरिएको छ ।

विश्व ऋण परिषदका अनुसार सन् २०२६ को अन्तर्राष्ट्रिय साकोस सम्मेलनपछि एशिया र अफ्रिकाका साकोसहरूको नेतृत्व तथा व्यवस्थापकीय क्षमता अभिवृद्धि गर्ने उद्देश्यले अष्ट्रेलियन म्युचुअल फाउन्डेसन (एएमएफ)  को सहकार्यमा उक्त कार्यशालाको आयोजना गरिएको हो ।