म्याडिसन, अमेरिका । अन्तर्राष्ट्रिय क्रेडिट युनियन अभियानमा गत वर्ष (सन् २०१९ मा) मात्र १ करोड ७० लाख सदस्य थपिएका छन् । यो सँगै अभियान आबद्धहरुको संख्या २९ करोड १० लाख पुगेको छ भने विश्वका १ सय १८ राष्ट्रमा सञ्जाल विस्तारित भएको छ । सन् २०१९ को तथ्याङ्क समावेश भएको विश्व ऋण परिषद् (ओकू) को प्रतिवेदनमा उक्त जानकारी उल्लेख छ ।
क्रेडिट युनियन अभियानमा पछिल्लो दश वर्षमा १० करोड (५९ ५० सदस्य थपिएका छन् । खासगरी ल्याटिन अमेरिका, अफ्रिका र एशियामा सदस्यता वृद्धि उल्लेख्य रहेको ओकूको प्रतिवेदनको निष्कर्ष छ ।

सन् २०१०–२०१९ को बीचमा विश्वभर भएको सदस्यता वृद्धि निम्नानुसार रहेको छः
ल्याटिन अमेरिका      १५३ प्रतिशत
अफ्रिका                  १४३ प्रतिशत
एशिया                    ८१ प्रतिशत
ओसेनिया                ४८ प्रतिशत
उत्तर अमेरिका         ३० प्रतिशत
क्यारेबियन             १७ प्रतिशत
युरोप                     ८ प्रतिशत
अष्ट्रेलिया सँगै मध्य तथा दक्षिणी प्रशान्त महासागर क्षेत्रका १४ वटा मुलुकहरुलाई ओेसेनियाको रुपमा चित्रित गरिन्छ । यो क्षेत्रमा क्रेडिट युनियनमा जोडिएसँगै सदस्यहरुको प्रतिव्यक्ति आम्दानी अन्य महादेशभन्दा बढी वृद्धि भएको छ । ती क्षेत्रमा औसतमा सन् २०१८ भन्दा सन् २०१९ मा २४ प्रतिशतले प्रति सदस्य आम्दानी वृद्धि भएको उल्लेख छ । यसैगरी, विश्वभरको क्रेडिट युनियको कुल सम्पत्तिमा २६ प्रतिशत वृद्धि भएको छ भने बचत, जगेडा कोष र लगानीमा पनि वृद्धि भएको प्रतिवेदनमा उल्लेख छ ।