बर्दिया । सदस्य शिक्षा कार्यक्रमलाई निरन्तरता दिँदै सिको बचत तथा ऋण सहकारी संस्था लि. बर्दियाले शिक्षा शिविर एवम् विस्तारित मञ्च कार्यक्रम सञ्चालन गरेको छ । सदस्य शिक्षा शिविर कार्यक्रम मार्फत साकोसले सिको महिला जिविकोपार्जन क्लव गठन गरी कृषि कार्यका लागि सामुहिक जमानीमा विना धितो ऋण उपलब्ध गराउने निर्णय गरेको छ । 

कोरोना भाईरसका कारण लामो समयदेखि शेयर सदस्यहरुलाई सहकारी शिक्षा सञ्चालन गर्न नसकिएकोले ५ वटै सेवाकेन्द्र मार्फत सदस्य शिक्षा विस्तारित मञ्ज कार्यक्रम आयोजना गरिएको संस्थाले जनाएको छ । 

साकोसका शिक्षा उप समिति संयोजक प्रकाश कुमार आचार्य र व्यवस्थापक हरिहर पौड्यालको संयोजनमा सदस्यहरुका लागि वित्तिय साक्षरता तथा सहकारीको नीति नियम सम्बन्धमा जानकारी गराइएको हो । 

कार्यक्रममा सेवाकेन्द्र व्यवस्थापन उप समिति, शिक्षा उप समिति तथा व्यवस्थापकले कोरोना भाईरसका कारण व्यवसायमा परेको प्रभाव, व्यवसाय पुनर सञ्चालन कार्य, ऋण सदुपयोगीता तथा साधारण सभाले पारित गरेका नयाँ नीति नियमहरुको विषयमा सदस्यहरुबीच छलफल तथा अन्तरक्रिया कार्यक्रमहरु गरिएको संस्थाका व्यवस्थापक हरिहर पौडेलले जानकारी गराउनुभयो । 

छलफलबाटै सामूहिक बचत र सामूहिक कृषि कार्यका लागि सामूहिक अवधारणा अनुरुप सिको महिला जिविकोपार्जन क्लवहरु गठन गरिएको छ । उक्त क्लवको निणर्य बमोजिम क्लवमा आवद्ध सदस्यहरुलाई कृषि कार्यका लागि सामूहिक जमानीका आधारमा एक लाख सम्म बिना धितो ऋण उपलब्ध गराइने निर्णय भएको छ, यसप्रति सदस्यहरु निकै उत्साहित हुनुभएको छ, व्यवस्थापक पौड्यालले भन्नुभयो, विस्तारित मञ्च कार्यक्रमले सदस्यहरुमाझ पुगेर सहकारीले प्रदान गर्ने विविध सेवा र सहुलियतपूर्ण कर्जा साथै साधारणसभाबाट पारित भएका कार्यक्रम तथा योजनाहरुको बारेमा जानकारी गराउने अवसर मिलेको छ । 

७ हजार ५ सय सदस्य मार्फत कुल ३० करोड पुँजी परिचालन गरेको उक्त साकोस सदस्यहरुको उत्साहपूर्ण सहभागिता, आर्थिक अनुशासन तथा असल वित्तिय कारोवारका कारण बिगत ५ वर्ष देखि लगातार नेपालस्तरको साकोस गुणस्तर सुनिश्चितताको कार्यक्रम–प्रोवेशन ब्राण्ड र गत वर्ष एसियाली स्तरको एक्सेस ब्राण्ड प्राप्त गर्न सफल भएको छ ।