दोलखा । ६४औं राष्ट्रिय सहकारी दिवसका अवसरमा हाम्रो जनकल्याण बचत तथा ऋण सहकारी संस्थाले भीमेश्वर नगरपालिका ६ रामकोट स्थित आमाको माया छात्रावासमा रहेका १४ जना अनाथ बालकहरूलाई सामाजिक उत्तरदायित्वपूर्ण कार्यक्रम अन्तर्गत आज परोपकारको काम गरेको छ । 

मर्यादित व्यवसाय र प्रविधिमा सहकारी भन्ने नाराका साथ देशव्यापी रुपमा राष्ट्रिय सहकारी दिवस मनाउने तयारी गरिरहँदा हाम्रो जनकल्याण साकोसले भुकम्पका बेला आमा बाबु गुमाएर बेसहारा बनेका अनाथ बालकहरु रहेको आमाको माया छात्रावासका लागि पिउने पानी व्यवस्थापनका लागि वाटर डिस्पेन्सर, पानी पिउने बोटल, चामल, दाल, चिनी, खानेतेल गरी ११ हजार बराबरको जिन्सी सहयोग वितरण गरिएको संस्थाका प्रमुख कार्यकारी अधिकृत दिपक बस्नेतले बताउनुभयो । 

जिल्ला सहकारी संघ दोलखा सँगको सहकार्यमा भएको सहयोग वितरण कार्यक्रम संस्थाका उपाध्यक्ष कमल प्रसाद चौलागाईको अध्यक्षतामा भएको थियो । कार्यक्रममा नेफ्स्कूनका सञ्चालक जिवसराज खडका, जिल्ला सहकारी संघका दोलखाका अध्यक्ष हेमन्त चौलागाई, नेफ्स्कूनका बरिष्ठ कार्यक्रम अधिकृत प्रेमनाथ वाग्ले लगायत जिल्ला सहकारी संघ, दोलखा जिल्ला बचत तथा ऋण सहकारी संघका पदाधिकारी, संस्थाका सञ्चालक, कर्मचारी लगायतको उपस्थिति रहेको थियो । 

त्यसैगरी ६४ औं राष्ट्रिय सहकारी दिवसका अवसरमा जिल्ला सहकारी संघ दोलखा र जनहित सहकारी संस्थाले गौरीशंकर बालगृहका अनाथ बालकहरुका लागि खाद्यान्न तथा स्टेशनरी, प्रगति साकोसले श्री भीमेश्वर बहिरा प्राथमिक विद्यालयमा सरसफाईका सामग्री तथा स्टेशनरी र आवाज नेपाल दोलखाका लागि तीन वटा खाट परोपकार महिला साकोस तथा सारथी साकोसले संयुक्त रुपमा वितरण गरेको थियो । परोपकारी कार्यको जिल्ला सहकारी संघ दोलखा तथा दोलखा जिल्ला बचत तथा ऋण सहकारी संघले अगुवाई गरेको थियो ।