धुलिखेल । वैतेश्वर-५ दोलखास्थित समुदायमा आधारित जनसचेतन बचत तथा ऋण सहकारी संस्था लि.का सञ्चालकहरुको क्षमता अभिवृद्धि तालिम CUDCC आजबाट धुलिखेलमा सुरु भएको छ । तालिम कार्यक्रमको उद्घाटन प्रमुख अतिथि एवम् नेफ्स्कूनका अध्यक्ष परितोष पौड्यालले गर्नुभएको थियो भने नेफ्स्कूनकी उपाध्यक्ष शान्ति अधिकारी अतिथिको रुपमा रहनुभएको थियो । उद्घाटन कार्यक्रममा नेफ्स्कून अध्यक्ष पौड्यालले जनसचेतन साकोस अभियानको उत्कृष्ट साकोसहरुमध्येको एक भएको बताउँदै यसको गरिमा ठूलो भएको उल्लेख गर्नुभयो । उहाँले जनसचेतन सहकारी सिक्ने थलो भएको बताउनुभयो भने अब सहकारीहरु प्रविधिमैत्री हुनुपर्ने आवश्यकता औंल्याउनुभयो । अध्यक्ष पौड्यालले भन्नुभयो, ‘अब साकोसहरुको गन्तव्य डिजिटाइजेशन हो ।’
धेरै पछि आयोजित भौतिक कार्यक्रममा नेफ्स्कूनकी उपाध्यक्ष शान्ति अधिकारीले जनसचेतन साकोसबाट सबैलाई सहकारी सिक्ने मौका मिलेको बताउनुभयो । समुदायमा आधारित लामो इतिहास बोकेको दिगो, विश्वसनीय र गुणस्तरीय साकोसबाट सफल सहकारी सञ्चालनका बारेमा सबैले जानकारी लिने मौका पाएको उहाँले बताउनुभयो । उपाध्यक्ष अधिकारीले साकोसको निरन्तरको प्रगतिका बारेमा आफु जानकार रहेको समेत उल्लेख गर्नुभयो । बाल वचतमा पनि जनसचेतनले प्रगति गरेको उहाँले बताउनुभयो ।
साकोसका अध्यक्ष हेमन्त चौलागाईले प्रमुख अतिथि र अतिथिसँगै तालिममा सहभागीहरुलाई स्वागतसँगै हार्दिक धन्यवाद दिनुभयो । साउन ८ गतेसम्म चल्ने तालिमको सहजीकरण नेफ्स्कूनका बरिष्ठ तालिम अधिकृत बल्लभ तिमल्सिना तथा तालिम अधिकृत सुमनराज घिमिरेले गर्नुभएको छ ।

२०५० साल असोज २२ गते स्थापित जनसचेतन साकोस २०६५ सालमा नेफ्स्कूनले एशियाली ऋण महासंघसँगको सहकार्यमा सञ्चालन गरेको एक्सेस कार्यक्रममा आबद्ध भई २०६९ सालमा ब्रान्ड प्राप्त गर्न सफल भएको हो । संस्थाले हाल ३३ हजार ५ सय सदस्यलाई सेवा प्रवाह गरिरहेको छ । मैनापोखरी मुख्य कार्यालय रहेको साकोसका १५ वटा सेवा केन्द्र छन् भने हालै मात्र कार्यक्षेत्र विस्तार गरी दोलखा, काभ्रे र काठमाडौं उपत्यकाका ३ वटै जिल्ला समेटेको छ ।