काठमाडौं । सहकारीका सदस्यको बचतलाई सुरक्षित बनाउन दरिलो संयन्त्र आवश्यक भएको अर्थमन्त्री जनार्दन शर्माले बताउनुभएको छ । आज राष्ट्रिय सहकारी बैंकको १९औं स्थापना दिवसको अवसरमा आयोजित ‘सहकारीमा लघु वित्त सम्मेलन’ मा बोल्नुहुँदै अर्थमन्त्री शर्माले भन्नुभयो, “सहकारी अभियानले ६ दशकको अवधिमा विविध क्षेत्रमा राम्रो उपस्थिति जनाउन सकेको भएपनि यसलाई व्यवस्थित ढंगले नियमन र सहजिकरण गर्ने सवालमा सशक्त निकायको आवश्यकता महशुस गरेको छु ।” त्यस्तै उहाँले सहकारीको चेक बैंक तथा वित्तीय संस्थामा नचल्ने विद्यमान व्यवस्था खारेज गर्ने वचन पनि दिनुभएको छ । ‘सहकारी जनताको हो, जनताको चेक नचल्ने नियम हुन सक्दैन । यो व्यवस्था खारेज हुन्छ, उहाँले भन्नुभयो । 

सहकारीले अब रोजगारी सिर्जना, गरिबी निवारण, उत्पादनमुखी अर्थतन्त्र निर्माणमा विशेष ध्यान दिनुपर्छ ।  उहाँले भन्नुभयो, “अर्थतन्त्रका प्रमुख तीन खम्बामध्ये एक खम्बाको रुपमा रहेको सहकारीलाई सरकारले साथमा लिएर हिँडेमात्र अर्थतन्त्रले पूर्णता पाउनेछ ।” सहकारी र लघुवित्त संस्थाहरुले गरिबी न्यूनीकरणमा योगदान पुग्ने किसिमका कार्यक्रमहरु ल्याउनुपर्छ । घरजग्गा को कारोबार गर्नेहरुको तुलनामा गरिबका लागि सहकारी र लघुवित्तले प्रदान गर्ने ऋणको व्याज सरल हुनुपर्यो ।  गरिबी न्यूनिकरणका कार्यक्रमलाई सहकारी अभियानले अझ व्यवस्थित रुपमा अघि लैजानुपर्ने उहाँको भनाई थियो । उत्पादनमुखी अर्थतन्त्रको विकास अहिलेको आवश्यकता भएकाले सहकारी संघ संस्था र लघुवित्त संस्थाहरु त्यसतर्फ केन्द्रित हुनुपर्नेमा उहाँले जोड दिनुभएको थियो ।

बैंकले सहकारी अभियन्ता सम्मान पुरस्कार राष्ट्रिय सहकारी महासंघका निवर्तमान अध्यक्ष केशव प्रसाद बडाल र सहकारी बैंक विद्धता पुरस्कार डा. नवराज सिंखडालाई प्रदान गरेको थियो भने पत्रकार शर्मिला ठकुरी र राष्ट्रिय सहकारी बैंकका उत्कृष्ट कर्मचारीहरु लगायतलाई सम्मान पुरस्कार प्रदान गरेको थियो ।

मंगलवार सुरु भएको ‘सहकारीमा लघु वित्त सम्मेलन–२०७८’ भोलिसम्म चल्नेछ । कोरोनाका कारण भौतिक उपस्थिति कम गराउँदै भर्चुअल माध्यममार्फत सहभागीहरुलाई जोडिन अनुरोध गरिएको उक्त सम्मेलनमा आज छ सयभन्दा बढीको सहभागिता रहेको थियो ।