काठमाडौं । दाङ जिल्लाका तीन सहकारीले नेफ्स्कूनको सदस्यता लिएका छन् । जिल्लाको शुभकामना बचत तथा ऋण सहकारी संस्था, सर्वोदय बचत तथा ऋण सहकारी संस्था र छहारी बचत तथा ऋण सहकारी संस्था नेफ्स्कूनको दाङ फिल्ड कार्यालय अन्तर्गत हिजो एक कार्यक्रमका बीच संघमा आबद्ध भएका हुन् । संघको सदस्यता सँगै सर्वोदय र शुभकामना साकोसले अभियानको आफ्नै सफ्टवयर नेकोस प्लस समेत जडान गरेका छन् भने नेफ्स्कूनको सदस्य संस्था रहेका सहरा साकोस र शुभ सन्देश साकोसले पनि हिजै नेकोस प्लस सफ्टवयर जडान गरेका छन् । 

केन्द्रीय संघमा आबद्ध भएसँगै संघले प्रदान गर्ने सेवा सुविधाहरुको प्रयोग साथै साकोस एकरुपता प्रणालीमा जोडिने बचनबद्धता दाङका नयाँ सदस्य संस्थाहरुले व्यक्त गरेका छन् । 

संघको सदस्यता लिएसँगै सर्वोदय साकोसका अध्यक्ष गुणाकरण भुसालले भन्नुभयो,“सहकारी अवधारणाको परिधिभित्र रहेर प्रभावकारी कार्यसञ्चालनका साथै एकरुपता प्रणाली विकास गर्न नेफ्स्कूनमा सहभागी भएका छौं, साकोसको संस्थागत विकास, प्रविधि प्रयोग र सदस्य केन्द्रीत सेवा प्रवाहमा केन्द्रीय संघको साथ सहयोग अपेक्षा गरेका छौं ।  उहाँले भन्नुभयो, “अभियानमा साकोस एकरुपताका लागि साथै सहकारीका मुल्य, मान्यता तथा नीति र प्रविधि सञ्चालनमा एक भएर अगाडि बढन् सदस्यता अनिवार्य नै हो ।” 

२०६५ सालमा स्थापना भएको सर्वोदय साकोस विचका केही बर्ष प्रभावकारी रुपमा सञ्चालन हुन नसकेपनि गत ४ बर्षदेखि गति लिएको अध्यक्ष भुसालले बताउनुभयो । १ सय ३० सेयर सदस्य रहेको उक्त साकोसको कुल पुँजी एक करोड पुगेको छ । यस बर्ष करिब  १ सय  ५० सदस्य पुर्याउने लक्ष्य लिएको साकोसले संकलित पुँजी उत्पादनमुलक क्षेत्रमा लगानी गर्ने योजना अगाडि सारेको छ ।