काठमाडौं । स्याङ्जा जिल्लाको वालिङ नगरपालिकाका सबै प्रकृतिका सहकारीहरुको अवस्था विश्लेषणको काम सम्पन्न भएको छ । नेफ्स्कूनले स्थानीय तहहरुसँगको समन्वयमा सबै प्रकृतिका सहकारीहरुको अवस्था विश्लेषण, प्रोफाइल तयारी, आवश्यक तालिम, शिक्षाका कार्यक्रमहरुसँगै सक्षमता विकास र उद्यमशिलता प्रवर्धन लगायतका क्षेत्रमा सहयोग गर्ने उद्देश्यसहित लागु गरेको आधारशिला कार्यक्रम अन्तर्गत वालिङ नगरपालिकाका सहकारीहरुमा घरदैलो साथै साक्षात्कार गरी जागरणको प्राथमिक चरणको काम सम्पन्न गरेको हो । 

वालिङ नगरपालिका भित्र रहेका विभिन्न प्रकृतिका ९८ वटा सहकारीको घरदैलो कार्यक्रम तथा साक्षात्कार कार्यक्रम मार्फत सहकारीका समसामयिक वस्तुस्थितिका बारेमा बुझ्ने प्रयास भएको छ । जस अन्तर्गत नगरपालिका भित्र सञ्चालित बचत तथा ऋण सहकारी २४, कृषि सहकारी २३, बहुउद्देश्यीय सहकारी २१, उत्पादन सहकारी २५, उपभोक्ता सहकारी ३ र श्रमिक सहकारी २ को अवस्था विश्लेषण गरिएको छ  । ती मध्ये ४१ सहकारी संस्था पानमा दर्ता भएका छन् भने ५७ सहकारी पानमा दर्ता भएका छैनन् । हालसम्म नगरपालिकाका ४५ सहकारीले कोपोमिसमा आफ्ना समष्टिगत विवरण प्रविष्टि गराइसकेका छन् भने ५३ सहकारीले कोपोमिसमा आफ्ना जानकारीहरु प्रविष्टि गराएका छैनन् ।   

सहकारीका सोही वस्तुस्थितिलाई मध्यनजर गर्दै नेफ्स्कूनद्वारा सहकारीमा जागरण ल्याउन स्थानीय तहका जनप्रतिनिधि र जिल्ला बचत संघको अगुवाइमा आज श्रावण १८ गते सहकारीको अवस्था विश्लेषण तथा सचेतिकरण कार्यक्रमको समेत आयोजना गरिएको थियो । 

स्याङ्जा जिल्ला बचत संघका अध्यक्ष रविन्द्र प्रसाद श्रेष्ठको अध्यक्षतामा आयोजित कार्यक्रममा वालिङ नगरपालिकाका नगर प्रमुख कृष्ण खाँडको प्रमुख आतिथ्यता र नगर उप प्रमुख कविता तिवारीको विशेष आतिथ्यता रहेको थियो । 

कार्यक्रममा स्याङ्जा जिल्ला बचत संघका लेखा समिति संयोजक मुक्ति प्रसाद पाण्डे र नेफ्स्कून पोखरा फिल्ड कार्यालय व्यवस्थापन उपसमिति सदस्य विद्या श्रेष्ठको आतिथ्यता सहित स्थानीय सहकारीकर्मी र विभिन्न प्रकृतिका सहकारीबाट गरी करिब ७० जनाको सहभागिता रहेको थियो । 

प्रमुख अतिथि नगर प्रमुख कृष्ण खाँडले वालिङ नगरपालिकाका सहकारीको संरक्षण र विकासका लागि नेफ्स्कूनसँगको सहकार्य र आधारशिला कार्यक्रम मार्फत अगाडि बढ्ने प्रतिबद्धता व्यक्त गर्नुभयो । 

जिल्ला बचत संघका अध्यक्ष रविन्द्र प्रसाद श्रेष्ठले नेफ्स्कूनद्वारा सञ्चालित आधारशिला कार्यक्रमले धुमिल सहकारी अभियान सङ्गो बनाउन सहयोग पुग्ने विचार व्यक्त गर्नुभयो । 

कार्यक्रममा आधारशिला कार्यक्रमको उद्देश्य, सहकारीको विकास र प्रवर्धनका लागि चालिएका कदमहरु, सहकारीका समसामयिक विषयवस्तु, सहकारी ऐन, नियम तथा निर्देशन र सहकारी क्षेत्रको विकास र प्रवर्धनमा नेफ्स्कूनको भूमिकाको विषयमा बरिष्ठ अधिकृत नविनराज दाहाल र कार्यक्रम अधिकृत रिता सुवदीले प्रस्तुतीकरण गर्नुभएको थियो । 

नगरपालिकाका सहकारी शाखा प्रमुख भुवानी तिवारीले नियामक निकायको काम कर्तव्यका बारेमा जानकारी गराउँदै सहभागीहरुका जिज्ञासाको सम्बोधन गर्नुभएको थियो । 

कार्यक्रम सञ्चालन तथा व्यवस्थापन सहजीकरण नेफ्स्कून पोखरा फिल्ड कार्यालयकी इन्चार्ज यमकला सुवेदीले गर्नुभएको थियो । 

स्याङ्जाको वालिङ नगरपालिका भित्रका सहकारीहरुको सूक्ष्म विश्लेषणका क्रममा रहनुभएका नेफ्स्कूनका बरिष्ठ अधिकृत दाहाल र अधिकृत सुवेदीद्वारा कुल ९८ सहकारीहरुको अवस्था, सदस्य संख्या, कारोबार, ऋण लगानी, कार्यालय व्यवस्थापन, कर्मचारी, सञ्चालक समिति, साधारणसभा आदि विषयहरुमा सम्पूर्ण जानकारी अद्यावधिक गर्ने काम भएको थियो । विभिन्न सूचकहरुका आधारमा सहकारीको वस्तुस्थिति अध्ययनको पहिलो चरणको काम सम्पन्न भएको बरिष्ठ अधिकृत दाहालले जानकारी गराउनुभयो । तथ्यांक र सूचना संकलनको पहिलो चरणको काम सम्पन्न भएसँगै दोस्रो चरणको काम सुरु हुनेछ । जागरण, विकास, प्रवर्धन र सञ्जालीकरण गरी ४ चरणमा विभाजन गरिएको आधारशिला कार्यक्रमले अन्य तीनवटा कार्यक्रम समापन गरेसँगै पूर्णता प्राप्त गर्नेछ । आधारशिला कार्यक्रम स्थानीय तह मातहत रहेका ग्रामिण र दुर्गम क्षेत्रमा सञ्चालित सहकारीहरुमा क्रमैसँग लागु गर्दै लगिनेछ । हालसम्म २६ वटा स्थानीय तहसँग सम्झौता भई आधारशिला कार्यक्रम अगाडि बढेको छ ।