लमजुङ । नेफ्स्कून फिल्ड कार्यालय लमजुङकोे आयोजनामा बजार प्रतिनिधिहरूको क्षमता विकास तालिम बेशीसहरमा सम्पन्न भएको छ । पौष २२ र २३ गते दुई दिन सञ्चालित तालिम संघका सञ्चालक समिति तथा लमजुङ फिल्ड कार्यलय व्यवस्थापन उपसमिति संयोजक कमला देवि गिरीको अध्यक्षतामा भएको थियो । 

तालिम शुभारम्भका अवसरमा बोल्दै सञ्चालक गिरीले सहकारी संस्थामा कार्यरत बजार प्रतिनिधि पदमा कार्यरत कर्मचारीहरु संस्थाको प्रमुख सद्भाव राजदुत अर्थात संस्थामा सदस्य सम्बन्ध विकासको मेरुदण्डको रुपमा रहेको बताउनुभयो । 

उहाँले संस्था र सदस्यबीचको सम्वन्धमा यस तहका कर्मचारीको विशेष भूमिका रहने साथै संस्थाले  उत्पादन गरेका वस्तु तथा सेवा सदस्यहरुमाझ पुर्याउने सम्बन्धसेतुको रुपमा रहेको बताउनुभयो । समग्र संस्थाको विकास र संस्थागत छवी बनाउन साथै समुदायमाझ साकोसको पहिचान स्थापित गर्न बजार प्रतिनिधि कर्मचारीहरुको भूमिका रहनेहुँदा कर्मचारी क्षमता विकास अनिवाय रहने स्पष्ट पार्नुभयो ।  सञ्चालक गिरीले तालिम बाट सिकेका कुरा व्यवहारमा र संस्थामा प्रयोग गर्न अनुरोध गदै तालिम सफलताको शुभकामना व्यक्त गर्नुभयो । 

तालिममा विभिन्न २१ वटा बचत तथा ऋण सहकारी संस्थाबाट ३६ जनाको सहभागिता रहेको थियो । 

तालिमको सहजिकरण नेफ्स्कूनका तालिम अधिकृत रविन्द्र श्रेष्ठले गर्नु भएको थियो भने व्यवस्थापन फिल्ड कार्यलय प्रमुख विनोद ढकाल र सन्देश घिमिरेले गर्नुभएको थियो ।