काभ्रे । नेफ्स्कून र एसियाली ऋण महासंघ (अक्कू) को संयुक्त आयोजनामा द लिडरसिप वुटक्याम्प सम्बन्धी उत्प्रेरणात्मक तालिम आजबाट काभ्रेको धुलिखेलमा शुरु भएको छ । तीन दिवसीय उक्त तालिम नेफ्स्कूनका सञ्चालक समिति र लेखा सुपरिवेक्षण समितिलाई लक्षित गरी अयोजना गरिएको हो । 

संघका अध्यक्ष परितोष पौड्यालको अध्यक्षतामा शुरु तालिमको उद्घाटन प्रमुख अतिथि भूमि व्यवस्था, सहकारी तथा गरिबी निवारण मन्त्रालयका सचिव डा. दामोदर रेग्मी र विशिष्ट अतिथि राष्ट्रिय सहकारी महासंघका अध्यक्ष मिनराज कडेलले गर्नु भएको थियो । 

उद्घाटन सत्रलाई सम्बोधन गर्दै प्रमुख अतिथि सचिव डा. दामोदर रेग्मीले मानिसको पाउ एक नीति हो र यसले समग्र जिम्मेवारीलाई डोर्याउछ भन्दै सहकारी आफैमा विकासको एक महत्वपूर्ण क्षेत्र रहेको चर्चा गर्नुभयो ।  सहकारीसँग गरिब, विपन्न र सामाजिक रुपमा पछाडि पारिएका वर्ग जोडिएको हुँदा सामाजिक रुपान्तरण, आर्थिक रुपान्तरण तथा शासकीय पद्धतीको अनुपालनको अभ्यासमार्फत समग्र अर्थतन्त्रमा सहकारीको महत्वपूर्ण योगदान रहेको बताउनुभयो । वास्तवमा नेफ्स्कूनको अभ्यासबाट मैले सिक्ने मौका पाएको छु भन्दै सचिव रेग्मीले भन्नुभयो, “नेपालमा समग्र सहकारी विकासमा बचत तथा ऋण सहकारी अभियानको मुख्य भुमिका र योगदान छ, यस क्षेत्रको विकासका लागि मन्त्रालय सदैव सहकार्य गरेर अगाडि बढ्छ ।”

कार्यक्रममा संघका बरिष्ठ उपाध्यक्ष चन्द्रप्रसाद ढकालले स्वागत मन्तव्य व्यक्त गर्दै  सहकारी अभियानलाई सार्थक र सफल अभियानको रुपमा विकास गर्न सवैबीचको सहकार्यात्मक सम्बन्ध विकासको अपरिहार्यता माथि प्रकाश पार्नुभयो ।

कार्यक्रमको सञ्चालन नेफ्स्कूनका महासचिव दामोदर अधिकारीले गर्नु भएको थियो । कार्यक्रममा नेफ्स्कूनका सञ्चालक समिति, लेखा सुपरिवेक्षण समिति, एशियाली ऋण महासंघकी प्रमुख कार्यकारी अधिकृत लेनी, प्रमुख प्राविधिक अधिकृत रञ्जित हिताराची र उच्च व्यवस्थापन समूहको सहभागिता रहेको थियो । 

 
सो अवसरमा एसीयाली ऋण महासंघकी प्रमुख कार्यकारी अधिकृत एलिनिता भि स्यान रोक्के (लेनी) ले शानदार नेतृत्व विकासका लागि असल आचरण विकास साथै सुदृढ सहकारी अभ्यासको अनुशरण गर्नुपर्ने बताउनुभयो । नेपालले बचत ऋण अभ्यासमा गरेको अनुकरणीय उदारहणबाट आफु निकै खुशी भएको सिइओ लेनीले बताउनुभयो । 

राष्ट्रिय सहकारी महासंघका अध्यक्ष मिनराज कडेलले साकोस अभियानको उचाईप्रति सदैव सम्मान र शुभभाव रहेको विचार व्यक्त गर्नुभयो । उहाँले आज आयोजित तालिम आफैंमा नयाँ र नेतृत्वमा नयाँ सोच र उत्प्रेरण मिल्ने विश्वास लिएको बताउनुभयो । 

तालिम उद्घाटन सत्रको समापनका अवसरमा बोल्दै संघका अध्यक्ष पौड्यालले आजको तालिम लिडरसिफ्ट अभ्यासको युगान्त शुरुवाती अभियान रहेको प्रशंग उल्लेख गर्दै अभियानमा नेतृत्व रुपान्तरणको विषयमा चर्चा गर्नु भएको थियो । उहाँले बचत तथा ऋण सहकारी अभियानमा क्रेडिट युनियन ऐनको विषय, औचित्यता र यसको महत्वको बारेमा सन्दर्भ प्रस्तुत गर्दै तालुक मन्त्रालयले यस विषयमा छिट्टै ठोस पहलकदमी गरोस् भन्ने अपेक्षा रहेको बताउनुभयो ।