बुटवल । लुम्बिनी प्रदेश बचत तथा ऋण सहकारी संघ लि.(प्रोस्कून लुम्बिनी) को आयोजनामा ३ दिने “सहकारीमा वित्तिय जोखिम– मापन र ब्यवस्थापनका रणनीतिहरु” विषयक तालिम सम्पन्न भएको छ । रुपन्देही, पाल्पा, नवलपरासी र कपिलवस्तुका १८ सहकारीका ब्यवस्थापक एवं ऋण प्रमुखहरुको तालिममा सहभागिता थियो । फागुन १२, १३ र १४ गते बुटवलमा आयोजित तालिममा सहभागीहरुले मिहिन ढंगले आ–आफ्नो सहकारी संस्थाको वित्तीय विश्लेषण गरी जोखिमका क्षेत्र पहिचान र जोखिम निवारणका रणनीति र उपाय सम्भावनाबारे बारे छलफल गरेका थिए ।  

सहकारीका जोखिमका क्षेत्र पहिचान र त्यसको पूर्व रोकथाम तथा संस्थागत सजगता अपनाउदै संस्थाहरुलाई दीगो र कृयाशील बनाइ रहन यो तालिम उपयोगी हुने तालिममा सहभागी सामुहिक विकास बचत तथा ऋण सहकारी संस्था लि.का प्रमुख कार्यकारी अधिकृत देवराज ज्ञवालीले बताउनु भयो । सहकारीमा PEARLS को उपयोग भए पनि हालसम्म सतहि मात्र प्रयोग भइ रहेको अवस्थामा यस तालिमले PEARLS को भित्री मकसद र संस्थाको कारोबारको मसिना कुराहरु समेत केलाउन उपयोगी भएको ज्ञवालीको भनाइ छ ।

तालिममा सहभागी नमूना महिला बचत तथा ऋण सहकारी संस्था लि.का ब्यवस्थापक मञ्जु गोदारले तालिममा सिकेका कुरालाई ब्यवहारमा प्रयोग गर्दा संस्थाको वित्तिय स्वास्थ्यको सम्पूर्ण अवस्थाको बारेमा जानकारी प्राप्त हुने कुरा बताउनु भयो । अन्धकारमुक्ति बचत तथा ऋण सहकारी संस्था लि. पाल्पाका सहायक ब्यवस्थापक प्रविण न्यौपानेले यस तालिम पछि प्राप्त औजारहरुको उपयोग गर्दा संस्थाको यथार्थ चित्रण हुने बताउनु भएको छ ।

नेफ्स्कूनका पूर्व कोषाध्यक्ष तथा PEARLS विज्ञ केशवप्रसाद पोखरेलले प्रशिक्षण दिनु भएको तालिममा आरभ्भ सत्रमा प्रोस्कून लुम्बिनीका अध्यक्ष कृष्णप्रसाद नेपालले ३ दिने तालिमले सहभागीहरुलाई संस्था सञ्चालनका लागि उपयोगी औजार उपलब्ध गराउने दाबी गर्नुभयो । संघका शिक्षा समिति संयोजक भरत भूसालले तालिम केवल सुन्नका लागि नभइ प्रयोगात्मक रुपमा नै विश्लेषण गरेर सीप प्राप्त गर्न आयोजना गरिएको बताउनुभयो ।