ललितपुर । नःबहालस्थित पद्मावती बचत तथा ऋण सहकारी संस्था लि. ले ज्येष्ठ सदस्यहरुलाई सम्मान गरेको छ । पद्मावती साकोसका अध्यक्ष नेमवीर शाक्यको अध्यक्षतामा आज आयोजित कार्यक्रमा नेफ्स्कूनका अध्यक्ष चन्द्रप्रसाद ढकालको प्रमुख आतिथ्यता रहेको थियो । कार्यक्रममा नेफ्स्कूनका अध्यक्ष ढकालले समुदायमा आधारित सहकारी संस्थाहरुले संयमित भएर कारोबार र सदस्य सेवाका कार्यक्रमहरु प्रभावकारी रुपमा सञ्चालन गरिरहेको भन्दै प्रसन्नता व्यक्त गर्नुभयो । 

उहाँले समुदायमा आधारित सदस्य केन्द्रीत पद्मावती साकोस जस्ता संस्थाहरुले केवल बचत तथा ऋणको कारोबार मात्र नभई सदस्यहरुको जीवनको विविध पक्षमा टेवा पुर्याउने गरी अनुकरणीय कार्यक्रमहरु सञ्चालन गर्दै आएको उल्लेख गर्नुभयो । अध्यक्ष ढकालले सबै सहकारीहरु खराब हुन भन्ने भाष्य चिर्न आवश्यक रहेको भन्दै त्यसका लागि सदस्य सेवाका कामहरु नै गतिलो जवाफ हुने बताउनुभयो । आफ्ना सदस्य संघ संस्थाहरुलाई सहयोग गर्न नेफ्स्कून सधै तयार रहेको बताउँदै नीति, विधि र प्रविधिमा आधारित रही काम गर्नुपर्ने विषयमा अध्यक्ष ढकालले जोड दिनुभयो । 

पद्मावती साकोसको वृद्ध उपसमितिको व्यवस्थापनमा २०औं वृद्ध वार्षिक समारोहको उपलक्ष्यमा ७८ वर्ष उमेर पुगेका संस्थाका ज्येष्ठ सदस्यहरुलाई आज एक कार्यक्रमका बीच प्रमुख अतिथि ढकाल, संस्थाका अध्यक्ष, अन्य अतिथि लगायतले सम्मानित गर्नुभएको थियो । पद्मावती साकोसले प्रत्येक वर्ष चैत महिनामा वृद्ध सम्मान कार्यक्रम गर्दै आएको छ ।

२०५० सालमा स्थापित पद्मावती समुदायमा आधारित सदस्य केन्द्रीत बचत तथा ऋण सहकारी संस्था हो ।