काठमाडौं । शंखधर चोक, मध्यपुर थिमि ४ भक्तपुर मुख्य कार्यालय रहेको बालकुमारी बचत तथा ऋण सहकारी संस्था लि. ले २५ औं स्थापना दिवस तथा रजत महोत्सव २०८१ को लोगो एक औपचारिक कार्यक्रम आयोजना गरी लोकार्पण गरेको छ ।

संस्थाका अध्यक्ष तुईलाल श्रेष्ठले लोगो लोकार्पण गर्दै रजत महोत्सवको अवसरमा साताव्यापी कार्यक्रमका आयोजना गर्ने जानकारी दिनुभयो । संस्थाले आगामी भाद्र २७ गतेदेखि असोज २ गतेसम्म विभिन्न कार्यक्रम गरी २५ औं स्थापना दिवस मनाउने उहाँले बताउनुभयो ।

स्थापना दिवसको अवसरमा संस्थाले वित्तीय साक्षरता तथा सदस्यता वृद्धि कार्यक्रम, भक्तपुर जिल्लाव्यापी चित्रकला कार्यक्रम, खुल्ला रक्तदान कार्यक्रम, वृद्धाआश्रम तथा मानवविद्या गृहमा भोजन दान तथा भौतिक सामाग्री हस्तान्तरण गर्ने भएको छ । त्यसैगरी सरसफाई, प्रभातफेरी गरी रजत महोत्सव मनाउने भएको छ।

त्यसैगरी बालकुमारी रजत स्मारिक प्रकाशन, चाँदीको सिक्का निकाल्ने, संस्थापकहरुलाई सम्मान तथा पूर्व सञ्चालक र संस्थामा योगदान गरेकाहरुलाई समेत सम्मान गर्ने कार्यक्रम रहेको संस्थाले जनाएको छ ।

२०५७ साल असोज २ गते २८ जना सदस्य र ७ लाख पुँजीबाट सुरु भएको संस्था समुदायमा आधरित रहेको वित्तीय कारोबार गर्दै आएको छ । गत असार मसान्तसम्म संस्थाको  शेयर पुँजी १३ करोड ७० लाख ९७ हजार, बचत संकलन १ अर्ब ७८ करोढ ५८ लाख,ऋण लगानी १ अर्ब ३६ करोड ७६ लाख,जगेडा तथा अन्य कोष ८ करोड  ३९ लाख ८८ हजार,र तरलता ६१ करोड ४८ लाख रहेको छ।

संस्थाको कुल कारोबार २ अर्ब १३  करोड ८८ लाख पुगको व्यवस्थापक सुजेन्द्र श्रेष्ठले बताउनुभयो । संस्थाले स्थापनाकाल देखि नै बचत ऋणको माध्यमबाट सदस्यहरुको आर्थिक तथा सामाजिक रुपान्तरणमा समुदाय केन्द्रीत भएर कारोबार गर्दै आएको उहाँले बताउनुभयो । 
साकोसले विभिन्न समयमा सदस्यहरुको लागि सहकारी शिक्षा, वित्तीय साक्षरता, उद्यमशीलता विकास, नेतृत्व विकास, व्यावसायिक तथा अभिमुखीकरण, हाजिरी जवाफ, वक्तृत्वकला, निबन्ध तथा नृत्य प्रतियोगिता जस्ता कार्यक्रम निरन्तर गर्दै आएको छ ।