काठमाडौं । नेफ्स्कूनका कोषाध्यक्ष दिपक थापाले साकोसहरुले विद्यमान कानुनहरुको पूर्ण पालना गर्नुपर्ने बताउनुभएको छ । सहकारी सञ्चालनको क्रममा संस्थाका कर्मचारीहरु सञ्चालकहरुको सल्लाहकार सरह भएको बताउँदै उहाँले कानुनको पूर्ण पालन गराउनमा कर्मचारीहरुको महत्वपूर्ण भूमिका रहने स्पष्ट पार्नुभयो ।

नेफ्स्कूनको आयोजनामा साउन २३ गते काठमाडौंमा आयोजित कर योजना तथा व्यवस्थापन तालिममा बोल्दै कोषाध्यक्ष थापाले संस्थालाई सुशासित र अनुपालन कायम राख्न कर्मचारीहरु हरेक विधामा सञ्चालकहरु भन्दा छिटो अद्यावधिक हुनु पर्ने कोषाध्यक्ष थापाले बताउनुभयो । सहकारी सञ्चालकहरुले परदर्शी नेतृत्व प्रदान गर्न समय सापेक्ष रुपमा आफूलाई विभिन्न विधामा अद्यावधिक गराइरहनुपर्ने आवश्यकता पनि उहाँले औंल्याउनुभयो ।

साकोसले सदस्यलाई धनी बनाउनु पर्दछ भन्दै उहाँले त्यसको लागि हरेक क्रियाकलापको योजना बनाएर कार्यान्वयन गर्नु पर्नेमा उहाँले जोड दिनुभयो । ती मध्ये कर योजना तथा व्यवस्थापन महत्वपूर्ण क्रियाकलाप भएको उहाँले बताउनुभयो । संस्थाले राज्यलाई बुझाउनु पर्ने कर आन्तरिक राजस्व विभागले जारी गरेका निति नियम अनुसार पूर्ण रुपमा बुझाउनुपर्ने उहाँको भनाइ थियो । नेफ्स्कूनले समय सापेक्षा सदस्य संघ संस्थाहरु क्षमता विकासका लागि विभिन्न किसिमका तालिम तथा गोष्ठिहरु सञ्चालन गरिरहेको र अवका दिनमा पनि गर्ने कोषाध्यक्ष थापाले जानकारी गराउनुभयो ।

कर विज्ञ प्रद्युमन घिमिरेको प्रशिक्षण रहेको तालिमको समापन कार्यक्रमको सञ्चालन र सहजीकरण संघका तालिम अधिकृत रविन्द्र श्रेष्ठले गर्नुभएको थियो भने व्यवस्थापन सहयोग संघकी तालिम सहायक जया घिमिरेले गर्नुभएको थियो । तालिममा २४ जनामा महिला सहित जम्मा ४० जनाको सहभागिता रहेको थियो । तालिममा १० जिल्लाका ३६ साकोसबाट सहभागिता रहेको थियो ।

तालिमका सहभागीहरुले नेफ्स्कूनले आफ्ना सदस्य संघ संस्थाहरुलाई समय सापेक्षा तालिम आयोजना गरेमा धन्यवाद दिदैं यो तालिमले सहकारी संस्थामा आकर्षित हुने आयकर ऐन २०५८ र आर्थिक विधेयक, आर्थिक ऐन २०८१ को बारेमा जानकारी प्राप्त भएको बताउनुभयो ।

सहकारी संस्थाले पालना गर्नु पर्ने विभिन्न कानुन मध्ये कर अनुपालन साहै महत्वपूर्ण रहेको भन्दै सहकारी संस्थाहरुले बुझाउने राजस्वका विभिन्न शिर्षकहरुको बारे सैद्धान्तिकसँगै व्यावहारिक ज्ञान हासिल भएको बताउनुभयो । साथै सहकारी संस्थाले सरकारलाई बुझाउने राजस्व भुक्तानिका लागि आ.व को शुरुवातमा नै योजना बनाएर कर तिरेमा संस्थामा व्यवभार नपर्ने र आर्थिक कारोवारलाई योजनाबद्ध ढंगवाट सञ्चालन गर्न तालिम नै फलदायी भएको प्रतिक्रिया व्यक्त गर्नुभयो । आगमाी दिनमा नेफ्स्कूनले समय सापेक्ष तालिम तथा गोष्ठी आयोजना गर्नु पर्ने सुझाव उहाँहरुको थियो ।