काठमाडौं । रुपन्देहीस्थित नमूना महिला बचत तथा ऋण सहकारी संस्था लि. ले ३३औं अन्तर्राष्ट्रिय अपाङ्गता दिवसको अवसरमा संस्थाको कार्यक्षेत्रभित्रका फरक क्षमता भएकाहरुलाई सम्मानसँगै अन्तरक्रिया कार्यक्रम गरेको छ । साकोसकी अध्यक्ष जमुना उपाध्यायको अध्यक्षता, बुटवल उपमहानगरपालिका १६ का वडाध्यक्ष कृष्णप्रसाद पौडेलको आतिथ्यता, उपाध्यक्ष उमा पोखरेलको स्वागत, तथा सचिव मिना घर्तीको सञ्चालनमा कार्यक्रम सम्पन्न गरिएको थियो ।

नमूना महिला साकोसले सहकारी सामाजिक उत्तरदायित्व अन्तर्गत कार्यक्षेत्रभित्रका बुबाआमा, दाजुभाइ, दिदीबहिनी गरी ८७ जनालाई सम्मान गरेको हो ।

कार्यक्रममा अपाङ्ग महिला संघकी अध्यक्ष कल्पना ढकाल, साकोसकी संस्थापक अध्यक्ष रमा खड्का, प्रमुख अतिथि लगायतका वक्ताहरुले स्थानीय स्तरमा रहेका सहकारीहरुमध्ये नमूना महिलाले उत्कृष्ट कार्य गर्दै आएको भन्दै प्रशंसा गर्नुभएको थियो । आफ्नो सदस्यता नरहेपनि नमूना महिला साकोसले घरभित्र रहेका आफन्तहरुलाई बाहिर ल्याउने वातावरण निर्माण गरेकोमा कृतज्ञता व्यक्त गर्दै सदस्य बन्ने प्रतिबद्धता समेत व्यक्त गर्नुभएको थियो ।

आगामी दिनमा पनि समुदायको हितका निम्ति यस्ता कार्यक्रमहरुलाई निरन्तरता दिदैं विशिष्ट पहिचान स्थापित गर्ने दिशामा अग्रिम शुभकामना दिनुभएको थियो ।