काठमाडौं । ३३औं वार्षिक साधारणसभाको अन्तिम तयारीमा रहेको नेपाल बचत तथा ऋण केन्द्रीय सहकारी संघ लि. (नेफ्स्कून) ले आज पूर्व अध्यक्षहरु एवम्  सल्लाहकारहरुसँग परामर्श गरेको छ । साधारणसभालाई सफलापूर्वक सम्पन्न गर्ने सिलसिलामा नेफ्स्कूनका अध्यक्ष चन्द्रप्रसाद ढकाल, महासचिव घनश्याम अधिकारी, कोषाध्यक्ष दिपक थापा र प्रमुख कार्यकारी अधिकृत डा.शिवजी सापकोटा लगायतले आज अपरान्ह संघका पूर्व अध्यक्षहरु परितोष पौड्याल, डीबी बस्नेत, ऋषिराज घिमिरे र मिनराज कडेलसँग राय, सल्लाह, सुझाव लिनुभएको हो ।

कार्यक्रममा पूर्व अध्यक्षहरुले नेफ्स्कूनको वित्तीय अवस्थामा उल्लेख्य सुधार भएको भन्दै प्रशंसा गर्नुभएको थियो । साथै उहाँहरुले सहकारी अभियानका चुनौतीहरुको सामना एक ढिक्का भएर गर्ने विषयमा पनि नेफ्स्कूनको बुटवल साधारणसभाले बलियो सन्देश प्रवाह गर्ने विश्वास व्यक्त गर्नुभयो ।

कार्यक्रममा नेफ्स्कूनका अध्यक्ष ढकाल, महासचिव अधिकारी, कोषाध्यक्ष थापा र प्रमुख कार्यकारी अधिकृत सापकोटाले साधारणसभालाई सफल बनाउन सबै किसिमका तयारीहरु अन्तिम चरणमा रहेको भन्दै संघले वित्तीय लगायत सुशासनका क्षेत्रमा उल्लेख्य सुधार गरेको तथ्याङ्क र दाबी समेटिएको प्रतिवेदनका मुख्य विषयहरु जानकारी गराउनुभएको थियो । साथै उहाँहरुले अग्रजहरुको सल्लाह र मार्गदर्शनले साकोस अभियानलाई बलियो बनाउने पनि जानकारी गराउनुभएको थियो ।

नेफ्स्कूनको ३३औं वार्षिक साधारणसभा पुस ५ र ६ गते बुटवलमा आयोजना हुँदैछ ।