काठमाडौं । रौतहट बचत तथा ऋण सहकारी संघ लि ले फागुन ३ गते चन्द्रपुर-३ गैंडाटार स्थित धामी पार्कमा जिल्लाभरका विभिन्न प्रकृतिका प्रारम्भिक संस्थामा कार्यरत कर्मचारीबीच आत्मियता, सहकार्य, समन्वय सुदृढ बनाउन अन्तरक्रिया तथा वनभोज कार्यक्रम आयोजना गरेको छ ।

खासगरी कर्मचारीहरुबीच परिचायत्मक अन्तरसम्बन्ध स्थापना, असल अभ्यास आदान प्रदान, कार्य क्षेत्रमा काम गर्दा बेहोर्नुपरेका साझा समस्याको पहिचान, कर्मचारी संजाल स्थापना, संघलाई पृष्ठ पोषण प्रदान गर्ने खालका सुझाव, सहकारीप्रति पछिल्लो समयमा विकास भएका नकारात्मक धारणा चिर्ने लगायतका उद्देश्य राखेर कार्यक्रम आयोजना गरिएको हो ।

कार्यक्रममा ३८ संस्थाका १२० कर्मचारी, ६ संस्थाका  अध्यक्ष, १४ जना संघका संचालक  र कर्मचारी  २ जना पत्रकार गरि १ सय ४२ जनाको उपस्थिति रहेको थियो ।

कार्यक्रमको उद्घाटन संघका अध्यक्ष विभु पोखरेलले गर्नुभएको थियो भने स्वागत उपाध्यक्ष रामबिश्वास पासवान, माघ मसान्तसम्मको वित्तीय प्रतिवेदन कोषाध्यक्ष नरेन्द्र राना, कार्यक्रमको उद्देश्य सचिव वसन्त आचार्य र सञ्चालन महासचिव देब बहादुर सापकोटाले गर्नु भएको थियो ।

कार्यक्रममा मधेस प्रदेश म्यानेजर्स क्लबका सस्थापक संयोजक यज्ञ प्रसाईं, राष्ट्रिय सहकारी बैंक शाखा कार्यालय चन्द्रनिगाहपुरका प्रमुख रुपा लामिछाने रौतहट कृषि सहकारी संघका सदस्य धर्मेन्द्र चौधरी पत्रकार अनमोल कार्की र सुब्बा कार्कीको आतिथ्यता रहेको थियो ।

कार्यक्रममा विभिन्न संस्थाका कर्मचारीहरुले आ-आफ्नो जिज्ञासा राख्नुभएको थियो । यस्ता कार्यक्रम निरन्तर रुपमा राख्न र कर्मचारीलाई चलायमान बनाइ राख्न संघलाई सुझाव प्राप्त भएको बचत संघका अध्यक्ष पोखरेलले साकोस आवाजलाई जानकारी गराउनुभयो । कार्यक्रममा म्युजिकल चियर, घैलो फुटाउने खेल जस्ता मनोरञ्जनात्मक गतिविधिहरु पनि राखिएको थियो ।