काठमाडौं । टोखा नगरपालिका, गोंगबुमा रहेको महिलाहरुद्वारा सञ्चालित सेतो गुराँस बचत तथा ऋण सहकारी संस्था लिमिटेडले नेफ्स्कूनद्वारा सञ्चालित जोखिममा आधारित साकोस सुपरिवेक्षण (कर्ब्स) कार्यक्रममा आबद्धता जनाएको छ । 

साकोसको कार्यालयमा फागुन १८ गते आइतबार आयोजित एक संक्षित कार्यक्रमका बीच अध्यक्ष गंगा देवी मल्ल, नेफ्स्कूनकी कार्यक्रम अधिकृत सोविता मैनाली र कास्कूनकी कार्यक्रम अधिकृत सुनिता चलाउनेले  कार्यक्रम सम्झौतापत्रमा हस्ताक्षर गर्नुभएको थियो । कार्यक्रममा साकोसका सञ्चालक सदस्य एवं नेफ्स्कून गोंगबु सदस्य सेवा कार्यालय व्यवस्थापन उपसमिति सदस्य दुर्गा कार्की र अर्का सञ्चालक सदस्य नरकुमारी पुन, व्यवस्थापक किरण पौडेल, कर्मचारी गंगा सेढाईं र नेफ्स्कून गोंगबु सदस्य सेवा कार्यालयका व्यवसाय सहायक विक्रम रिमालको उपस्थिति थियो ।

समुदायका महिलाहरुलाई समेटेर सानो बचत अभियानबाट सुरु भएको सेतो गुराँस साकोसले हाल ५ सय ४२ सदस्यहरुमाझ सुरक्षित वित्तीय सेवा प्रदान गर्न सफल भएको छ भने संस्थाको कुल वासलात ११ करोड पुगेको छ ।