नवलपरासी । सहकारी क्षेत्रले दिगो तथा दीर्घकालिन लक्ष्य हासिल गर्न सहकारीहरुबिच सामुहिक ऐक्यबद्धता आवश्यक भएको धारणा सरोकारवालाहरुले राखेका छन् । नेपाल बचत तथा ऋण केन्द्रीय सहकारी संघ लि.(नेफ्स्कून) ले लुम्बिनी प्रदेश बचत तथा ऋण सहकारी संघ लि.र नवलपरासी बचत तथा ऋण सहकारी संघ लि.को समन्वयमा आयोजना गरेको सरोकारवाला, साकोसका अध्यक्ष र व्यवस्थापकहरुसँगको वृहत अन्तरक्रिया कार्यक्रममा वक्ताहरुले सो  कुरा बताएका हुन ।  

कार्यक्रममा नेफ्स्कूनका अध्यक्ष चन्द्र प्रसाद ढकालले पछिल्लो समयमा अध्यादेश र नेपाल राष्ट्र«« बैंकद्धारा जारी निर्देशनका विषय र यसमा रहेका असहज प्रावधानहरुप्रति संघले सदस्य संघ संस्थासँग माग गरेको राय सुझाव र संघको पहलकदमीका विषयमा जानकारी गराउनुभयो । नेफ्स्कून तपाईंहरुकै संघ संस्था हो, तपाईंहरुको आवाजलाई नेफ्स्कूनले सरकार समक्ष प्रतिविम्बित गर्दछ । सवै संघ संस्थाको साथ सहयोग रहेमा पछिल्ला समस्या समाधान गर्न सफल भईने धारणा अध्यक्ष ढकालले राख्नुभयो । उहाँले बचत तथा ऋणको कारोबार गर्ने सहकारीहरुको नियमनका लागि राष्ट्रिय सहकारी नियमन प्राधिकरण गठनको विषयलाई समेत जोड्दै यसमा सहभागीहरुले उठाएका जिज्ञासाहरुको समेत सम्बोधन गर्नुभएको थियो । 

लुम्बिनी प्रदेश बचत संघका अध्यक्ष कृष्ण नेपालले सहकारी विचमा साझा बुझाई विकास गर्न कार्यक्रम फलदायी रहेको विचार व्यक्त गर्नुभयो । प्रारम्भिक सहकारी संस्था र नियामक निकायबिचको दुरी साथै आन्तरिक समस्याका बिचमा जानकारी हुने भएकोले आगामी कार्य गर्ने वातावरण वन्ने विश्वास व्यक्त गर्नुभयो । उहाँले लुम्बिनी प्रदेश बचत संघले गरेका उपलब्धिहरुको विषयमा समेत जानकारी गराउँदै जिल्ला, प्रदेश र केन्द्रीय संघ मिलेर कार्य गर्दाको क्षणलाई निरन्तरता दिने जानकारी गराउनुभयो । 

नवलपरासी जिल्ला बचत तथा ऋण सहकारी संघका अध्यक्ष राजन कुमार आचार्यले संघको आयोजनामा नवलपरासीमा भएको यस कार्यक्रम अत्यन्तै उपलब्धीमुलक रहेको विचार राख्दै कार्यक्रमका सहभागीहरुलाई स्वागत गर्नुभयो । 

कार्यक्रममा नेफ्स्कूनका प्रमुख कार्यकारी अधिकृत डा.शिवजी सापकोटाले सहकारीका समसामयिक पछिल्ला विकसित घटनाक्रमहरु, नेफ्स्कूनको वस्तुस्थिति र अभियानको मार्गचित्र सम्बन्धमा प्रस्तुतीकरण गर्नुभएको थियो । 

कार्यक्रममा रुपन्देही जिल्ला बचत संघका अध्यक्ष बसन्त ढकालले नेफ्स्कूनले आयोजना गरेको यस अन्तरक्रियाबाट संघ तथा नियामक निकाय सदस्य संस्थाको अगाडि उभिएको महशुस भएको धारणा राख्नुभयो । नेफ्स्कून र मातहतका संघको सहकार्य मार्फत साझा धारणा बनाई अगाडि बढ्नेगरि कार्य गरेमा बचत संघको पूर्ण साथ र ऐक्यबद्धता रहने विषय जानकारी गराउनुभयो । 

त्यसैगरि सुनवल नगरपालिकाका सहकारी शाखा प्रमुख खेमराज ढकालले तीनवटै नगरपालिकाको प्रतिनिधित्व गर्दै स्थानीय निकायलाई सहभागी गराई सहकारीका समसामयिक विषय र अभियानको बारेमा बोल्ने अवसर प्राप्त भएको प्रति धन्यवाद व्यक्त गर्नुभयो । सहभागीहरुका जिज्ञासालाई समेत सम्बोधन गर्दै शाखा प्रमुख ढकालले पछिल्लो समय सहकारीको क्षेत्रमा विकास भएका नकारात्मक विषयहरुलाई चिर्न सहकारीका सञ्चालक समिति, लेखा समिति र कर्मचारीहरुबाट नै सम्भव हुने बताउनुभयो । स्थानीय निकायले आयोजना गरेका कार्यक्रमहरुमा प्रारम्भिक संस्था, जिल्ला, प्रदेश र केन्द्रीय संघलाई एकसाथ समेट्ने अवसर  नमिलेको बताउँदै अवका दिनमा एकसाथ अगाडि बढ्ने प्रतिबद्धता समेत व्यक्त गर्नुभयो । रामग्राम, बर्दघाट र सुनवल तीनवटै नगपालिकाको विषयवस्तु उजागर गर्न पाउँदा खुसी व्यक्त गर्नुभयो । उहाँले तीनवटै नगरपालिकाबाट सहकारी सम्बन्धी सेवामा कुनै कमी हुन नदिनेगरि आपसी समन्वयमा काम गर्ने बचनबद्धता समेत व्यक्त गर्दै नेफ्स्कूनप्रति आभार प्रकट गर्नुभयो ।

कार्यक्रममा स्थानीय सहकारका सहकारी प्रतिनिधिहरु रामग्राम नगरपालिकाका सहकारी शाखा प्रमुख राम सुबास गुप्ता, बर्दघाट नगरपालिकाका सहकारी शाखा प्रमुख सिर्जना अर्यालको विशेष आतिथ्यता रहेको थियो । 

त्यसैगरि कार्यक्रममा रुपन्देही सदस्य सेवा कार्यालय व्यवस्थापन उपसमितिका पूर्वसदस्य रविन्द्र विक्रम हमाल, पूर्व साकोस म्यानेजर्स क्लबका लुम्बिनी प्रदेश संयोजक अनन्त पाण्डे, टिकाराम तिमिल्सिनाको सहभागिता रहेको थियो ।

अन्तरक्रिया कार्यक्रममा नवलपरासी जिल्लाका विभिन्न ३५ वटा बचत तथा ऋण सहकारी संघ संस्थाहरुका सञ्चालक समिति र व्यवस्थापनबाट गरि ६५ जनाको सहभागिता रहेको थियो । 

सहभागीहरुको तर्फबाट सामुदायिक, ग्रामिण बाल्मिकी, जनकल्याण, हरकट्टादेवी, हरपुर आ.आ., त्रिवेणी महिला, सयपत्री, राष्ट्र««सेवक लगायतका साकोसहरुबाट सहकारीका समसामयिक घटनाक्रमहरुका सम्बन्धमा नेफ्स्कून र सरोकारवाला निकायहरुलाई आआफ्ना जिज्ञासा र सुझावहरु राख्नुभएको थियो । कार्यक्रम सञ्चालन नेफ्स्कूनकी सञ्चकल एवं रुपन्देही सदस्य सेवा कार्यालय व्यवस्थापन उपसमिति संयोजक ज्ञानु पौड्यालले गर्नुभएको थियो भने कार्यक्रमको व्यवस्थापन नेफ्स्कून भूमही सेवा केन्द्रकी  बरिष्ठ सहायक कल्पना भण्डारी र रुपन्देही सदस्य सेवा कार्यालयका बरिष्ठ सहायक नेत्र प्रसाद सापकोटाले गर्नुभएको थियो ।