भक्तपुर । जिल्ला बचत तथा ऋण सहकारी संघ लि. भक्तपुरको आयोजना र नेपाल बचत तथा ऋण केन्द्रीय सहकारी संघ लि.(नेफ्स्कून) को साझेदारी कार्यक्रम अन्र्तगत आज जोखिममा आधारित साकोस सुपरिवेक्षण (Credit Union Risk Based Supervision-CURBS) सम्बन्धी अभिमुखीकरण कार्यक्रम रोयल थाई हस्पिटालिटी, राधेराधेमा सम्पन्न भएको छ । 

कार्यक्रममा उद्घाटन मन्तव्य राख्दै भक्तपुर जिल्ला बचत तथा ऋण सहकारी संघ लि.का कोषाध्यक्ष कान्छाभक्त घजुले सहकारी संस्था स्तरीकरण कार्यक्रममा आवद्ध हुँदा संस्थालाई नीति, नियम विपरीत जान दिदैन र संस्थाको वित्तीय पाटोको बारेमा सुक्ष्म विश्लेषण हुने कुरा बताउनुभयो । उहाँले संस्थाको सञ्चालक समितिको नियमित बैठकमा मासिक रुपमा पर्ल्स सहीत वित्तीय विवरण पेश गरी सोको बारेमा गहन छलफल गर्नुपर्ने बताउनुभयो । साथै नेपाल सरकारले जारी गरेको सहकारी ऐन र नेपाल राष्ट्र बैंकले जारी गरेको निर्देशन तथा मापदण्डमा फरक फरक व्यवस्था हुुँदा सहकारी संस्थामा अन्यौलता रहेको बताउनुभयो । 

कार्यक्रममा संघका प्रमुख कार्यकारी अधिकृत बालकृष्ण धोजूले संघले कर्ब्स सम्बन्धी अभिमुखीकरण कार्यक्रम दोस्रो पटक आयोजना गरिएको र कर्ब्स, प्रोवेसन, एक्सेस जस्ता स्तरीकरण कार्यक्रमले संस्थाको स्तरोन्नति हुनुको साथै सदस्य, कर्मचारी, सञ्चालकको समेत सुरक्षण हुने विचार राख्नुभयो । 

नेफ्स्कूनका कार्यक्रम अधिकृत विदुर खड्काले साकोसमा हुने सम्भावित जोखिमको बारेमा प्रशिक्षण गर्नुहुँदै जोखिममा आधारित साकोस सुपरिवेक्षण कार्यक्रमको बारेमा प्रस्तुतीकरण गर्नुभयो । कार्यक्रममा संघमा आवद्ध २२ वटा  संस्थाहरुका पदाधिकारी, व्यवस्थापक तथा उच्च तहका कर्मचारीहरु र संघका पदाधिकारी, कर्मचारी समेत गरी ३८ जनाको सहभागिता रहेको थियो । कार्यक्रमको औपचारिक कार्यक्रम संघका अधिकृत कृष्णश्वरी ह्यौंमिखाले सञ्चालन गर्नुभयो ।