पोखरा । नेपाल बचत तथा ऋण केन्द्रीय सहकारी संघ लि.(नेफ्स्कून) पोखरा सदस्य सेवा कार्यालयको आयोजनामा आज पोखरामा सहकारीको परिवर्तित नियामकीय वातावरण र समसामयिक विषयकेन्द्रित अन्तरक्रिया सम्पन्न भएको छ । अन्तरक्रिया कार्यक्रममा जिल्लाका विभिन्न ६० बचत तथा ऋण सहकारी संस्थाबाट ७० जनाको  सहभागिता रहेको थियो । 

कार्यक्रममा नेफ्स्कूनकी सञ्चालक कमलादेवी गिरि, कास्की जिल्ला बचत संघका अध्यक्ष शेरबहादुर कार्की, कास्की जिल्ला सहकारी संघका सञ्चालक विना लोहनी, पोखरा महानगर सहकारी व्यवस्थापन समितिका सहकारी विज्ञ नारायण प्रसाद आचार्य, म्यानेजर्स क्लब कास्कीका अध्यक्ष मोहन प्रसाद अधिकारी, नेफ्स्कूनका प्राचार्य वल्लभ तिमल्सिना लगायत कर्मचारी र साकोस प्रतिनिधिहरुको उपस्थिति रहेको थियो । 

कार्यक्रममा संघका प्राचार्य बल्लभ तिमल्सिनाले नेपालको सहकारी क्षेत्रको समसामयिक नियामकीय वातावरण, यसको प्रभाव र आगामी रणनीति का सम्बन्धमा प्रस्तुतीकरण गर्नुभएको थियो । सहकारी क्षेत्रका विद्यमान चुनौती, अवसर, नीति र सुधारको विषयमा आफ्ना विचार राख्दै संघले समस्याको समाधानका उपायहरु खोजी गरिरहेको, निरन्तर सरोकारवालाहरुसँग वहश तथा पैरवी गरिरहेको जानकारी गराउनुभएको थियो । 

अन्तरक्रियाका क्रममा सहभागीहरुले सहकारी क्षेत्रका विद्यमान नीतगत अन्यौलतालाई चिर्दै समस्याको समाधानका लागि पहल गर्न नेफ्स्कून अगाडि बढ्नुपर्ने र त्यसमा साथ सहयोग र ऐक्यवद्धता अभियानको तर्फबाट निरन्तर रहने  प्रतिबद्धता व्यक्त गरेका थिए ।