धनगढी । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) सदस्य सेवा कार्यालय धनगढी र सेवा केन्द्र कञ्चनपुरको संयुक्त आयोजनामा “वित्तीय व्यवस्थापनका लागि पुँजी पर्याप्तता विश्लेषण” तालिम सफलतापूर्वक सम्पन्न गरेको छ । 

तालिमले सहकारी संस्थाहरूलाई आर्थिक रूपमा अझ सशक्त र सुदृढ बनाउने दिशामा ठोस योगदान पुर्‍याउँछ। पुँजी पर्याप्तताको ज्ञानले संस्थालाई वित्तीय निर्णयहरूमा दक्ष बनाउँछ, जसले संस्थाको समग्र विश्वसनीयता र स्थायित्वमा सुधार ल्याउँछ।

कार्यक्रमको अध्यक्षता नेफ्स्कून सञ्चालक समितिका सदस्य दिप्ती शाहीले गर्नुभएको थियो। उहाँले सहकारी संस्थाहरूको दिगो विकासका लागि वित्तीय व्यवस्थापनमा पुँजी पर्याप्तताको महत्व अत्यन्तै आवश्यक रहेको उल्लेख गर्दै, तालिमबाट प्राप्त ज्ञान र सीपहरू व्यवहारमा उतार्न सहभागीहरूलाई आग्रह गर्नुभयो।

तालिमको सहजीकरण नेफ्स्कून तालिम विभागका प्राचार्य बल्लभ तिमल्सिनाले गर्नुभएको थियो। उहाँले सहकारी क्षेत्रका विभिन्न कोषहरू, बासलात विवरण, नाफा(नोक्सान विवरण, सन्तुलन परीक्षण लगायतका वित्तीय सूचकहरूको गहिरो विश्लेषण प्रस्तुत गर्नुभयो। साथै, उदाहरणका स्लाइडमार्फत विषयवस्तु बुझाउँदै, सहभागीहरूलाई व्यावहारिक अभ्यास गराई उनीहरूको ज्ञान र सीपमा थप निखार ल्याउने प्रयास गर्नुभयो।

उक्त तालिममा धनगढी, कञ्चनपुर र डडेल्धुरा क्षेत्रका विभिन्न बचत तथा ऋण सहकारी संस्थाबाट ३३ भन्दा बढीको सहभागिता रहेको थियो।
कार्यक्रम सञ्चालनको जिम्मेवारी नेफ्स्कून धनगढी सदस्य सेवा कार्यालयका इन्चार्ज दीपकराज जोशीले लिनुभएको थियो भने आवश्यक व्यवस्थापन कार्य सेवा केन्द्र कञ्चनपुरका इन्चार्ज धर्मराज जोशीले गर्नुभएको थियो।