धुलिखेल । नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा आयोजना गरिएको नियमित निरिक्षण तथा अनुगमन अडिटर क्षमता विकास तालिम कार्तिक १४ गते  देखि धुलिखेलमा सुरु भएको छ । दुईदिने यो तालिम कार्तिक १४ र १५ गतेसम्म सञ्चालन हुने छ, जसमा संघका ५५ जना अधिकृत तथा सहायक अधिकृतहरूको सहभागिता रहेको छ।

तालिमको उद्घाटन गर्दै संघका अध्यक्ष चन्द्रप्रसाद ढकालले बचत तथा ऋण सहकारीहरूको संस्थागत विकासले नै क्षेत्रगत स्थायित्व सुनिश्चित गर्ने बताउँदै संघका अडिटरहरू संस्थाको समाधानका स्रोत केन्द्र बन्नुपर्नेमा जोड दिनुभयो।

तालीममा सहभागीहरूले कानुनी जोखिम, नियामकीय प्रतिवेदन, सम्पत्ति शुद्धीकरण निवारण कार्यान्वयन, बाह्य लेखा परिक्षण, स्प्रेड र सन्दर्भ ब्याजदर, कर चुक्ता, श्रम कानुन परिपालना, पूँजी पर्याप्तता अनुपात, तिर्न सक्ने सक्षमता, ऋण परिचालन, वित्तीय लगानी, बचत, बाह्य दायित्व, शेयरपूँजी, सञ्चालन खर्च, भाखा नाघेको ऋण प्रतिशत, र कुल वित्तीय जोखिम लगायतका विषयहरूमा सिकाइ लिँदैछन्। 

त्यसैगरी, समिति, उपसमिति र व्यवस्थापन, आन्तरिक लेखा परिक्षण, साधारण सभा, कर्मचारी नियुक्ति तथा कारवाही अभिलेख, प्रविधि, सदस्यता बृद्धि, सम्पत्ति बृद्धि तथा कुल सञ्चालन र सुशासन जोखिम र नियामकीय अनुकूलन योजना सम्बन्धी विषयहरूमा पनि छलफल हुनेछ। 

प्रशिक्षणका विभिन्न सत्रहरूमा एफ. सि. ए. राजकुमार फुँयालले NFRS रिपोर्ट, पूँजी पर्याप्तता, कर अनुपालना तथा सम्पत्ति शुद्धीकरण सम्बन्धी विषयमा प्रस्तुति दिनुभएको छ। साथै, ऋण जोखिमको सही वर्गीकरण, ऋण जोखिम, तरलता प्रतिशत, नकमाउने सम्पत्तिको अवस्था लगायतका जोखिम विषयमा पनि व्यावहारिक विश्लेषण गरिएको छ।
यस तालिमले नेफ्स्कूनका अडिटरहरूको सुपरिवेक्षण, विश्लेषण र मूल्याङ्कन दक्षता विकास हुनुका साथै स्क्यान कार्यक्रमको प्रभावकारिता वृद्धि हुने विश्वास लिएको छ ।