काठमाडौं । धान्याञ्चल बचत तथा ऋण सहकारी संस्था लिमिटेड को १६औँ वार्षिक साधारणसभा मङ्सिर २० गते शनिबार सम्पन्न भएको छ।

साधारणसभाको उद्घाटन संस्थाका सल्लाहकार तथा १६ नं. वडाका पूर्व अध्यक्ष स्वर्गीय मुकुन्द रिजाल र विश्व सहकारी अभियन्ताहरूको तस्बिरमा माल्यार्पण गरी गरिएको थियो। कार्यक्रम संस्थाका अध्यक्ष भविश्वर घिमिरेको अध्यक्षतामा तथा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) का अध्यक्ष चन्द्रप्रसाद ढकालको प्रमुख आतिथ्यतामा सम्पन्न भएको थियो।

कार्यक्रममा साकोसका संस्थापक सल्लाहकार एवं महिला नेतृ पुष्पा भुसाल, राष्ट्रिय सहकारी महासंघका पूर्व नायब महाप्रबन्धक तथा सहकारी विज्ञ बाबुल खनाल, नेफ्स्कूनका कार्यक्रम अधिकृत सुमनराज घिमिरे, काठमाडौं महानगरपालिका–२६ का अध्यक्ष खेम तिवारी, तारकेश्वर नगरपालिका–५ का वडाध्यक्ष शम्भुप्रसाद फुँयाललगायत विशिष्ट व्यक्तिहरूको उल्लेखनीय उपस्थिति रहेको थियो।

त्यसैगरी संस्थाका सल्लाहकारहरू प्रा.डा. मोहन पन्थी, कविता रिजाल, प्रा.डा. बलराम अर्याल, सूर्यप्रसाद अधिकारी, लेखनाथ पोखरेल, यादवप्रसाद घिमिरे, शिवलाल बेल्बासे, हरिसिंह केसी, डा. रामशरण थपलिया, गणेश चौधरीलगायतको पनि सहभागिता रहेको थियो। करिब ३५० जना सेयरधनीहरूको सहभागितामा सम्पन्न साधारणसभामा वक्ताहरूले धान्याञ्चल साकोसले आफूलाई एक सक्षम, अनुशासित र विश्वासिलो सहकारी संस्थाका रूपमा स्थापित गर्न सफल भएको उल्लेख गरे। उनीहरूले नेपालको सहकारी अभियानमा संस्थाले खेलेको भूमिकाको प्रशंसा गर्दै आगामी दिनमा अझ सचेतता, पारदर्शिता र सावधानीका साथ अघि बढ्न शुभकामना व्यक्त गर्नभएको थियो।

कार्यक्रममा मन्तव्य राख्दै राष्ट्रिय सहकारी महासंघका नायब महाप्रबन्धक एवम् सहकारी विज्ञ बाबुल खनालले सेयर धनीहरूमा बचत गर्ने संस्कार विकास गर्नु सहकारीको प्रमुख दायित्व भएको उल्लेख गरे। उनले सहकारी संस्थाहरू नाफामुखीभन्दा सेवामुखी भएर सञ्चालन हुनुपर्नेमा जोड दिँदै सुशासन, सदस्यकेन्द्रित सेवा र दीगो व्यवस्थापनमार्फत मात्र सहकारीप्रति जनविश्वास बलियो बन्ने बताउनु भयो। साधारणसभाले संस्थाको प्रगति, वित्तीय अवस्था र भावी कार्यदिशाबारे समेत छलफल गर्दै सफलतापूर्वक समापन भएको संस्थाले जनाएको छ।