पोखरा । नेपाल बचत तथा ऋण केन्द्रीय सहकारी संघ लि. (नेफ्स्कूनं) सँग  अलकापुर बचत तथा ऋण सहकारी संस्था लि, पुइमे बचत तथा ऋण सहकारी संस्था लि. र कर्मशिल बचत तथा ऋण सहकारी संस्था लि. पुस १ गते नियमित निरिक्षण तथा अनुगमन कार्यक्रम (स्क्यान) मा आबद्ध भएका छन् ।

सहकारी ऐन, २०७४ को दफा ९९ मा व्यवस्था भएबमोजिम संघद्वारा सुरु गरिएको यस कार्यक्रमले संघका सबै सदस्य संघ–संस्थाहरूलाई अनुगमन तथा निरीक्षण गरी आवश्यक मार्गदर्शन प्रदान गर्ने उद्देश्य राखेको छ ।

स्क्यान नेफ्स्कूनद्वारा सञ्चालित एक नियमित निरीक्षण तथा अनुगमन कार्यक्रम हो । यो कार्यक्रम बचत तथा ऋण सहकारी संस्थाहरूको वित्तीय सुशासन, जोखिम व्यवस्थापन र गुणस्तर सुनिश्चितता कायम गरी सदस्यहरूको बचतलाई सुरक्षित र स्वस्थ बनाउने विशिष्ट उद्देश्यका साथ लागू गरिएको हो ।

नेफ्स्कून पोखरा सदस्य सेवा कार्यालय प्रमुख सुरज चालिसे र वरिष्ठ सहायक दिप्ती आचार्य देबकोटाको रोहबरमा प्रथम पक्ष नेफ्स्कूनका तर्फबाट कार्यक्रम अधिकृत मनोज खड्का र दोस्रो पक्ष अलकापुर साकोसका तर्फबाट अध्यक्ष ख्याम नारायण पौडेल, पुइमे साकोसको तर्फबाट संस्थाको अध्यक्ष चिन काजी  गुरुङ्ग र कर्मशिल साकोसको तर्फबाट संस्थाको अध्यक्ष चन्द्र बहादुर गुरुङ्गको हस्ताक्षर समेतको उपस्थितिमा नियमित निरीक्षण तथा अनुगमन कार्यक्रम (स्क्यान) सम्झौता सम्पन्न भएको थियो ।