काठमाडौ । नेपाल बचत तथा ऋण केन्द्रीय सहकारी संघ लि. (नेफ्स्कून) बाट सप्तदेव बचत तथा ऋण सहकारी संस्था लि. बुढानीलकण्ठ नगरपालिका १०, कपन काठमाडौको स्क्यान कार्यक्रम अन्तर्गत पहिलो निरिक्षण तथा प्रोवेसन स्थलगत सुपरिवेक्षण माघ २० गते सम्पन्न भएको छ । 

संस्थाको स्क्यान प्रतिवेदन अनुसार जोखिम विवरण (प्रोफाइल) तयार गर्दै वित्तीय कानूनी जोखिमको अवस्था, वित्तीय जोखिम, बजार जोखिम तथा सुशासन जोखिमका विषयमा स्थलगतका क्रममा सुपरिवेक्षण गरिएको थियो । नेफ्स्कूनको स्तरीकरण कार्यक्रमको नियमित सुपरिवेक्षणबाट संस्थाको वित्तीय स्वस्थता विकास गर्न, जोखिम न्यूनीकरण गर्न, आन्तरिक सुदृढीकरण र व्यवसायिकतामा सहयोग पुगेको व्यवस्थापक पुरुषोत्तम नेपालले बताउनुभयो ।

सञ्चालक समिति पदाधिकारी तथा सदस्यहरु र व्यवस्थापनको सहभागितामा सञ्चालन भएको स्थलगत सुपरिवेक्षणका क्रममा संस्थाका अध्यक्ष बालकृष्ण भट्टराइले यस कार्यक्रमबाट संस्थाको वित्तीय सूचक सुधार , नियामकीय व्यवस्थाको परिपालनाका लागि नीतिगत व्यवस्था अद्यावधिक गर्न, सुशासन कायम गर्न, सदस्यहरुको विश्वास तथा संरक्षणमा सहयोग पुगेको तथा निरन्तर मार्गदर्शनको अपेक्षा गरेको बताउनुभयो । नेफ्स्कूनको नियमित सुपरिवेक्षणबाट प्रदान भएका सुझाव तथा पृष्ठपोषण कार्यान्वयन गर्दै संस्थाको निरन्तर विकासका लागि साकोसको सञ्चालक र व्यवस्थापन सदैव सक्रिय रहने प्रतिवद्धता व्यक्त भयो । 

स्क्यान कार्यक्रम सम्झौताका क्रममा संस्थाका अध्यक्ष बालकृष्ण भट्टराई र नेफ्स्कून कार्यक्रम अधिकृत सोविता मैनाली तथा अप्सरा अधिकारी र संस्थाका कर्मचारी तथा पदाधिकारीको रोहवरमा सम्झौता पत्रमा  नेफ्स्कूनका सहायक कार्यकारी अधिकृत दुर्गा प्रसाद ढकाल र व्यवस्थापक पुरुषोत्तम नेपालको हस्ताक्षरमा सम्पन्न भएको हास्क्यान तथा प्रोवेसनको स्थलगत सुपरिवेक्षण कार्यक्रम अधिकृत सोविता मैनाली र अनुगमन सहजकर्ता अप्सरा अधिकारीले गर्नु भएको हो ।