पोखरा । रूपन्देहीको तिलोत्तमा–३, शंकरनगरमा अवस्थित सामुहिक विकास बचत तथा ऋण सहकारी संस्था लि. को आयोजनामा सञ्चालित ५ दिने ‘सञ्चालकहरूको क्षमता अभिवृद्धि तालिम’ चैत्र ०५ गते, बिहीबार पोखरामा सम्पन्न भएको छ । 

नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक व्यवस्थापनमा चैत १ गतेदेखि ५ गतेसम्म पोखराको लेकसाइड स्थित मझेरी रिसोर्टमा कार्यक्रम सञ्चालन भएको थियो ।

संस्थाका अध्यक्ष पार्थमणि आचार्यको अध्यक्षता तथा नेफ्स्कूनका सञ्चालक समिति सदस्य कमला गिरिको प्रमुख आतिथ्यतामा समापन कार्यक्रम सम्पन्न भएको हो । तालिममा संस्थाका सञ्चालक समिति, लेखा सुपरिवेक्षण समिति, विभिन्न उपसमिति र व्यवस्थापनका गरी कुल २३ जनाको सहभागिता रहेको थियो ।

पाँच दिनसम्म चलेको तालिममा नेफ्स्कूनका तालिम तथा स्रोत केन्द्र विभागीय प्रमुख बल्लभ तिमल्सिना र वरिष्ठ अधिकृत कोमलराज अधिकारीले मुख्य प्रशिक्षकका रूपमा प्रशिक्षण दिनुभएको थियो । प्रशिक्षणका क्रममा सहकारीमा सुशासन व्यवस्थापन, जोखिम व्यवस्थापन, वित्तीय विश्लेषण, भाखा नाघेको ऋण व्यवस्थापन र ऋण प्रशासनका विषयमा गहन छलफल भएको थियो ।

यसैगरी, सञ्चालकको जिम्मेवारी, रणनीतिक योजना निर्माण, साकोसमा नेतृत्वको मूल्य सिर्जना र सम्बन्ध विस्तार जस्ता विषयमा व्यावहारिक अभ्याससहित प्रशिक्षण गराइएको थियो ।

समापन समारोहमा बोल्दै प्रमुख अतिथि कमला गिरिले सहकारी क्षेत्रमा देखा परेका वर्तमान चुनौती र नेफ्स्कूनका गतिविधिबारे जानकारी गराउनुभयो । उहाँले नेफ्स्कूनको स्तरीकरण कार्यक्रममा जोडिएका कुनै पनि सहकारीहरू धराशयी नभएको दाबी गर्नुभयो । “नेफ्स्कूनले आफ्ना सदस्य संस्थाहरूको सुशासन प्रक्रियाको हरबखत अनुगमन गर्ने र सुधारका लागि निरन्तर सुझाव प्रदान गरिरहेको कुरा व्यक्त गर्नुभयो ।