काभ्रेपलाञ्चोक । काभ्रेस्थित बुडोल सामुदायिक बचत तथा ऋण सहकारी संस्था लिमिटेडको आयोजनामा सञ्चालक समिति, लेखा सुपरिवेक्षण समिति र उपसमितिका पदाधिकारीहरुको नेतृत्व क्षमता विकासको उद्देश्यले नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहयोगमा लिडरशिप बुटक्याम्प पुनर्ताजगी कार्यक्रम चैत्र ०७ गते सम्पन्न भएको छ ।

संस्थाले यसअघि मिति २०८१ पुस १८ देखि २० गतेसम्म सञ्चालन गरेको लिडरशिप बुटक्याम्प कार्यक्रमको निरन्तरता स्वरूप यस वर्ष पुनर्ताजगी कार्यक्रम आयोजना गरेको हो । कार्यक्रम प्रख्यात नेतृत्व विशेषज्ञ तथा लेखक (John C. Maxwell)  कोLeader shift पुस्तकका ११ वटा अध्यायमा आधारित रही सञ्चालन भएको थियो ।

तालिम नेफ्स्कूनका प्राचार्य बल्लभ तिमल्सिना तथा बरिष्ठ अधिकृत प्रेमनाथ वाग्लेको सहजीकरणमा सम्पन्न भएको थियो । सञ्चालक समिति, लेखा सुपरिवेक्षण समिति, सल्लाहकार, उपसमिति तथा उच्च व्यवस्थापनका कर्मचारीहरू गरी कुल ३९ जनाको सहभागिता रहेको थियो ।

कार्यक्रमको समापन गर्दै संस्थाका अध्यक्ष कैलाश के.सी.ले तालिम अत्यन्त उपयोगी रहेको उल्लेख गर्दै यसले संस्थाको नेतृत्वमा रहेका व्यक्तिहरूको सोचलाई अझ परिष्कृत बनाउँदै प्रभावकारी नेतृत्व रुपान्तरणमा टेवा पुग्ने विश्वास व्यक्त गर्नु भएको थियो ।