काठमाडौं, कलंकी — सहकारी संस्थाहरूमा ऋण असुली तथा धितो लिलामी प्रक्रियालाई कानुनी, पारदर्शी र प्रभावकारी बनाउने उद्देश्यसहित आयोजित दुईदिने “ऋण असुली तथा धितो लिलामी आन्तरिक कार्यविधि निर्माण” तालिम वैशाख २५ गते सम्पन्न भएको छ ।

नेपाल बचत तथा ऋण केन्द्रीय सहकारी संघ लि.  (नेफ्स्कून) कलंकी सदस्य सेवा कार्यालयद्वारा आयोजित तालिम वैशाख २४ र २५ गते काठमाडौंको कलंकीमा सञ्चालन गरिएको थियो । तालिममा २४ सहकारी संस्थाबाट सञ्चालक समिति, ऋण उपसमिति, व्यवस्थापक, ऋण अधिकृत तथा कर्मचारीसहित ३५ जनाको सहभागिता रहेको थियो ।

ऋण असुली व्यवस्थापन, जोखिम न्यूनीकरण, धितो लिलामीको कानुनी प्रक्रिया तथा आन्तरिक कार्यविधि निर्माणसम्बन्धी विषयमा गहन छलफल गरिएको थियो । सहकारी क्षेत्रको वित्तीय अनुशासन सुदृढ गर्न स्पष्ट कार्यविधिको आवश्यकता रहेकोमा सहभागीहरूले जोड दिएका थिए । 

कार्यक्रमको उद्घाटन सत्रमा नेफ्स्कूनका प्रमुख कार्यकारी अधिकृत डा.शिवजी सापकोटाले सहकारी संस्थामा बढ्दो कर्जा जोखिम नियन्त्रणका लागि कानुनी आधारसहितको कार्यप्रणाली अपरिहार्य भएको धारणा व्यक्त गर्नु भएको थियो । संस्थाको वैधता र विश्वसनीयताबाट नै बचत जम्मा हुने तथा संस्थामा समस्या आउनुको मुख्य कारण ऋण व्यवस्थापन हुने भएकाले सदस्यहरूको मन जित्दै सही प्रक्रिया अपनाएर ऋण लगानी गर्नुपर्नेमा जोड दिनुभएको थियो । ऋणमा काम गर्ने कर्मचारी तथा ऋण संयोजक चुस्त, कडा र डकुमेन्टेसनमा विशेष ध्यान दिने खालका हुनुपर्ने, आफ्नै सदस्य भनेर आवश्यक कडाइ नगरी ऋण लगानी गर्दा संस्थामा समस्या उत्पन्न हुन सक्ने धारणा व्यक्त गर्नुभएको थियो ।

तालिमको सहजीकरण संघका प्राचार्य बल्लभ तिमिल्सिनाले ऋण असुली व्यवस्थापनसम्बन्धी विषयमा सहजीकरण गर्नु भएको थियो भने दोस्रो दिन कानुनी सल्लाहकार शिव अधिकारीले धितो लिलामी प्रक्रियाका कानुनी पक्षबारे प्रशिक्षण दिनु भएको थियो ।

कार्यक्रमको सञ्चालन कलंकी सदस्य सेवा कार्यालयका इन्चार्ज मनोज कार्कि,व्यवस्थापनतर्फ शम्भु प्रसाद घिमिरे र दिपेश अधिकारीले सहजीकरण भूमिका निर्वाह गर्नु भएको थियो ।