मोरङ, उर्लाबारी । मोरङको उर्लाबारी स्थित नारिसंकल्प बचत तथा ऋण सहकारी संस्था लिमिटेडको आयोजनामा दुई दिवसीय ’बचत खेल’ (saving game) तालिम सोमबार सम्पन्न भएको छ । 

जर्मन स्पार्कसेन्स्टिफ्टुङ्ग (German Sparkassenstiftung) को सहयोग तथा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोगमा तालिम सञ्चालन भएको हो ।

जेठ १० र ११ गते आयोजित तालिममा साकोसका २५ जना सदस्यहरूको सहभागिता रहेको थियो । सदस्यहरुलाई वित्तीय साक्षरता अभिवृद्धि गर्नुका साथै उनीहरूलाई व्यावहारिक रूपमा बचत र खर्च व्यवस्थापनका सीपहरू सिकाएर सीप हस्तान्तरण गर्न सक्षम बनाउनु तालिमको मुख्य उद्देश्य रहेको संस्थाले जनाएको छ ।

साकोसका सेयर सदस्यहरुलाई लक्षित गरि आयोजना गरिएको तालिमले सदस्यहरुमा वित्तीय साक्षरता र सशक्तिकरणप्रति जागरुग बनाउने विश्वास रहेको साकोसले जनाएको छ । सदस्यहरुमा बचत व्यवहार, वित्तीय योजना र समूह गतिशीलतामा व्यावहारिक अन्तर्दृष्टि प्रदान गर्ने काम गरेको छ । 

तालिमको उद्घाटन सत्रमा नारिसंकल्प साकोसका अध्यक्ष गोमा नेपालले यस तालिमबाट सिकेका सीपहरू सदस्यहरूको व्यावहारिक जीवनमा उपयोगी हुने विश्वास व्यक्त गर्नुभयो । उहाँले आम्दानी एवं खर्चको सही व्यवस्थापन गर्न र आकस्मिक रूपमा आइपर्ने समस्याहरूको समाधानका लागि बचत गर्ने बानी बसाल्न आवश्यक रहेको कुरामा जोड दिनुभयो ।

उक्त तालिमको सहजीकरण नेफ्स्कूनका कार्यक्रम अधिकृत रामप्रसाद सापकोटा र मुकेश दाहालले गर्नुभएको थियो भने कार्यक्रम सञ्चालन तथा सहजीकरण साकोसका प्रबन्धक चित्रबहादुर न्यौपानेले गर्नुभएको थियो ।