भक्तपुर । सहकारी संस्थाहरूलाई प्रभावकारी, उत्तरदायी र सदस्यमुखी बनाउन उपसमितिहरूको भूमिका थप सशक्त बनाउने उद्देश्यसहित भक्तपुर जिल्ला बचत तथा ऋण सहकारी संघ लिमिटेडले एकदिने ‘उपसमितिका सदस्यहरूको क्षमता विकास तालिम’ जेठ ३० गते  सम्पन्न गरेको छ ।

भक्तपुरको आदर्श स्थित क्लब बागमतीमा आयोजित तालिममा संघमा आबद्ध विभिन्न सदस्य संस्थाका उपसमितिका सदस्यहरूको उपस्थिति रहेको थियो । कार्यक्रममा सहकारी संस्थाभित्र उपसमितिहरूको भूमिका, जिम्मेवारी, कार्यक्षेत्र तथा संस्थागत विकासमा उहाँहरुको योगदानबारे गहन छलफल र प्रयोगात्मक अभ्यास गराइएको थियो ।

कार्यक्रमलाई सम्बोधन गर्दै संघका अध्यक्ष हरिकृष्ण बल्लले सहकारी संस्थाहरूको सफल सञ्चालनका लागि उपसमितिहरू सक्रिय, जिम्मेवार र परिणाममुखी हुनुपर्ने, निरन्तर सिकाइ र क्षमता अभिवृद्धि मार्फत मात्र संस्थालाई समयअनुकूल र सबल बनाउन सकिने उल्लेख गर्दै तालिमबाट प्राप्त ज्ञानलाई व्यवहारमा कार्यान्वयन गर्न सहभागीहरूलाई आग्रह गर्नुभएको थियो ।

हालै जारी सहकारी अध्यादेशप्रति समेत टिप्पणी गर्दै संघलाई तीन वर्षभित्र कारोबार बन्द गरी बचत फिर्ता गर्न दिइएको व्यवस्था व्यावहारिक नभएको धारणा राख्नुभयो । यस्तो व्यवस्थाले बजारमा बचत फिर्ताको दबाब बढाई सहकारी क्षेत्रमा थप चुनौती सिर्जना गर्न सक्ने भएकाले सम्बन्धित निकायले अध्यादेश पुनरावलोकन गर्नुपर्ने उहाँको भनाइ थियो ।

संघका सचिव तथा शिक्षा एवं संस्थागत विकास तालिम उपसमितिका संयोजक कान्छा भक्त घजुले संस्थालाई सही मार्गदर्शन गर्न उपसमितिको भूमिका अत्यन्त महत्वपूर्ण हुने उल्लेख गर्नुभएको थियो । सदस्यहरूको चेतना, सहभागिता र संस्थागत सुशासन अभिवृद्धिमा उपसमितिहरू अग्रपंक्तिमा रहनुपर्ने धारणा व्यक्त गर्नुभएको थियो ।

तालिमका मुख्य प्रशिक्षक तथा नेफ्स्कूनका विभागीय प्रमुख बल्लभ तिमिल्सिनाले सहकारी संस्थाहरूमा उपसमितिहरू केवल औपचारिक संरचना नभई संस्थागत सुशासन, पारदर्शिता र प्रभावकारी निर्णय प्रक्रियाका महत्वपूर्ण आधारस्तम्भ रहेकाले संस्थाको दीर्घकालीन सफलता, सदस्यको विश्वास अभिवृद्धि तथा संस्थागत अनुशासन कायम गर्न उपसमितिहरूले आफ्नो भूमिका स्पष्ट रूपमा बुझेर सक्रियतापूर्वक जिम्मेवारी निर्वाह गर्नुपर्नेमा जोड दिनुभएको थियो । प्रशिक्षणका क्रममा उपसमितिको गठन, कार्यक्षेत्र, अधिकार, जिम्मेवारी तथा कार्यसम्पादनका व्यावहारिक पक्षबारे विस्तृत प्रस्तुति दिनुभएको थियो । साथै, विभिन्न समूहगत अभ्यास, छलफल तथा उदाहरणमार्फत सहभागीहरूलाई आफ्नो संस्थाको वास्तविक अवस्थाको विश्लेषण गर्दै सुधारका सम्भावित उपायहरू पहिचान गर्ने अवसर प्रदान गर्नुभएको थियो । 

तिमिल्सिनाले सहकारी संस्थाहरूमा देखिने चुनौतीहरूको समाधानका लागि उपसमितिहरूले अनुगमन, सुझाव, मूल्याङ्कन तथा सदस्य शिक्षाजस्ता कार्यलाई प्रभावकारी रूपमा अघि बढाउनुपर्ने, सक्षम र क्रियाशील उपसमितिले संस्थागत सुशासनलाई मजबुत बनाउने मात्र नभई सदस्यहरूको विश्वास जित्दै संस्थालाई दिगो विकासको दिशामा अग्रसर गराउनुपर्ने बताउनु भएको थियो । 

प्रयोगात्मक सिकाइलाई प्राथमिकता दिँदै सञ्चालन गरिएको तालिममा सहभागीहरूले उपसमितिको भूमिका र जिम्मेवारीलाई व्यवहारमा कसरी लागू गर्ने भन्ने विषयमा समेत अनुभव आदानप्रदान गरेका थिए । प्रशिक्षकले सहभागीहरूको जिज्ञासाको समाधान गर्दै उपसमितिलाई संस्थाको ‘थिंक ट्याङ्क’ र ‘मार्गदर्शक संयन्त्र’का रूपमा विकास गर्नुपर्ने आवश्यकता औंल्याउनुभएको थियो ।

कार्यक्रमको समापन अवसरमा शिक्षा तथा संस्थागत विकास तालिम उपसमितिका सदस्य बालमुकुन्द उपाध्यायले सहभागीहरूको सक्रियता र सिकाइप्रतिको उत्साहको प्रशंसा गर्दै आगामी कार्यक्रमहरूमा पनि यस्तै सहभागिताको अपेक्षा व्यक्त गर्नुभयो । संघका उपसमिति सदस्य प्रकाश बास्तोलाद्वारा सञ्चालन गरिएको उक्त तालिममा संघअन्तर्गतका सदस्य संस्थाका विभिन्न उपसमितिका ३८ जना प्रतिनिधिहरूको सहभागिता रहेको थियो ।