दोलखा ।  भिमेश्वर नगरपालिका–६, चरिकोट, दोलखा स्थित अर्थभूमि बचत तथा ऋण सहकारी संस्था लिमिटेडमा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) द्वारा सञ्चालित नियमित निरीक्षण तथा अनुगमन (स्क्यान) कार्यक्रम कार्यान्वयनका लागि सम्झौता तथा स्थलगत सुपरिवेक्षण असार ०१ गते सम्पन्न भएको छ ।

सहकारी क्षेत्रको पारदर्शिता, उत्तरदायित्व तथा सदस्य हितको सुनिश्चित गर्ने उद्देश्यले सहकारी संस्थाहरूमा स्थलगत सुपरिवेक्षणलाई प्रभावकारी रूपमा अघि बढाइएको हो ।

सुपरिवेक्षणको मुख्य उद्देश्य बचत, ऋण, लेखापरीक्षण, लगानी तथा वित्तीय कारोबारको वास्तविक अवस्थाको मूल्याङ्कन गर्नु, सदस्यहरूले प्राप्त गरिरहेका सेवा–सुविधाको समीक्षा गर्नु तथा संस्थाभित्र हुन सक्ने त्रुटि, आर्थिक जोखिम र व्यवस्थापकीय कमजोरीहरूको पहिचान गरी सुधारका लागि सुझाव प्रदान गर्नु रहेको छ । साथै, भाखा नाघेका ऋणहरूको कानुनी प्रक्रियामा लैजाने विषय, संस्थाको निर्णय प्रक्रिया, नेतृत्वको पारदर्शिता, उत्तरदायित्व तथा सदस्य सहभागिताको मूल्याङ्कन गर्नुका साथै प्रविधिमा आधारित सदस्य सूचना प्रणालीको अधिकतम प्रयोगमार्फत जोखिम विश्लेषण गरी जोखिम न्यूनीकरणका उपायहरूको खोजी गर्नु पनि सुपरिवेक्षणको उद्देश्य रहेको छ ।

नेफ्स्कूनका कार्यक्रम अधिकृत राजन सुबेदीद्धारा भएको सुपरिवेक्षणमा संस्थाका अध्यक्ष, व्यवस्थापक तथा कर्मचारीहरूको सहभागिता रहेको थियो । सुपरिवेक्षणका क्रममा विनियम, नीति तथा आन्तरिक कार्यविधिको कार्यान्वयन, सम्पत्ति शुद्धीकरण निवारण नीतिसम्बन्धी नियामक निकायका निर्देशनहरूको पालना, भाखा नाघेको ऋण असुली, पूँजी पर्याप्तता अनुपातको विश्लेषण लगायत संस्थाको समग्र वित्तीय अवस्था तथा सहकारीले उपलब्ध गराउँदै आएको सेवा–सुविधाका विषयमा विस्तृत छलफल गरिएको थियो ।

कार्यक्रममा सुपरिवेक्षकबाट प्राप्त सुझावहरूलाई आगामी सञ्चालक समितिको बैठकमा विस्तृत रूपमा छलफल गरी चरणबद्ध कार्यान्वयनमा लैजाने प्रतिबद्धता संस्थाको तर्फबाट व्यक्त गरिएको छ ।