मकवानपुर । इन्द्रसरोवर ०४, फाखेल मकवानपुर स्थित सक्रिय महिला बचत तथा ऋण सहकारी संस्था लि. को आयोजना तथा नेफ्स्कून को प्राविधिक सहयोगमा दुई दिने सञ्चालक क्षमता विकास तालिम जेठ २९ गते होटल गोदावरी प्रा.लि., गोदावरी, ललितपुरमा सम्पन्न भएको छ ।

संस्थाको सञ्चालक समिति, लेखा तथा सुपरिवेक्षण समिति तथा विभिन्न उपसमितिका पदाधिकारी एवं सदस्यहरूको क्षमता अभिवृद्धि गर्ने उद्देश्यले तालिम सञ्चालन गरिएको हो । 

तालिमको उद्घाटन सत्रमा बोल्दै नेफ्स्कूनका प्राचार्य बल्लभ तिमल्सिनाले सहकारी संस्थामा सञ्चालकहरूको भूमिका केवल औपचारिक मात्र नभई नीति निर्माण, संस्थागत सुशासन र जिम्मेवार निर्णय प्रक्रियासँग प्रत्यक्ष जोडिएको हुने भएकाले सहकारी संस्थाको दीर्घकालीन सफलता, पारदर्शिता र सदस्यहरूको विश्वास कायम राख्न सञ्चालकहरूले आफ्नो भूमिका स्पष्ट रूपमा बुझेर सक्रिय, उत्तरदायी र जवाफदेही ढङ्गले कार्य गर्नुपर्ने बताउनुभएको थियो ।

सञ्चालकहरू संस्थाको रणनीतिक दिशानिर्देशन गर्ने प्रमुख आधार भएकाले उनीहरूले दैनिक व्यवस्थापनमा मात्र नभई नीति, योजना र अनुगमनमा समेत प्रभावकारी भूमिका निर्वाह गर्नुपर्ने उल्लेख गर्नुभएको थियो ।  साथै, संस्थागत अनुशासन कायम गर्दै स्रोत साधनको सही उपयोग, निर्णय प्रक्रियामा पारदर्शिता र सदस्यहितलाई प्राथमिकतामा राख्न सके मात्र सहकारी संस्था दिगो र विश्वसनीय बन्न सक्ने बताउनुभएको थियो ।  

नेफ्स्कूनका कार्यक्रम अधिकृत रविन्द्र श्रेष्ठले तालिमको सहजीकरण गर्दै संस्थाको चालु आर्थिक वर्षमा पाँचौँ चार वर्षीय रणनीतिक योजनाले निर्धारण गरेका लक्ष्यहरूको समीक्षा गरिएको थियो । साथै, रणनीतिक योजना कार्यान्वयनका क्रममा हासिल भएका उपलब्धिहरू तथा लक्ष्यअनुरूप सम्पन्न हुन नसकेका कार्यक्रमहरूको अवस्थाबारे समेत छलफल गरिएको थियो । उहाँले संस्थागत सुशासन, नेतृत्व विकास, रणनीतिक योजना कार्यान्वयन तथा सहकारी व्यवस्थापनका विविध पक्षबारे सहजीकरण गर्नुभएको थियो ।

तालिममा संस्थाका उच्च व्यवस्थापन तहका कर्मचारीहरूको समेत सहभागिता रहेको थियो ।  तालिमले संस्थाका पदाधिकारी तथा सदस्यहरूको ज्ञान, सीप र क्षमता अभिवृद्धि हुनुका साथै संस्थाको रणनीतिक लक्ष्य प्राप्तिका लागि थप प्रभावकारी रूपमा कार्य गर्न प्रेरणा मिलेको सहभागीहरूले बताएका थिए । संस्थाले आगामी दिनमा पनि यस्ता क्षमता विकासमूलक कार्यक्रमलाई निरन्तरता दिने जनाएको छ ।