काठमाडौं । भक्तपुरको मध्यपुर थिमि–०४, शंखधरचोक स्थित बालकुमारी बचत तथा ऋण सहकारी संस्था लिमिटेडको आयोजनामा वित्तीय साक्षरता तालिम सम्पन्न भएको छ ।

नेफ्स्कूनको प्राविधिक सहजीकरणमा जेठ ३० गते सम्पन्न एकदिवसीय तालिम सहकारीका सदस्य तथा सरोकारवालाहरूको वित्तीय ज्ञान तथा क्षमता अभिवृद्धि गर्ने उद्देश्यले आयोजना गरिएको हो ।

तालिमको अध्यक्षता साकोसका अध्यक्ष तुइलाल श्रेष्ठले गर्नुभएको थियो । नेफ्स्कूनका कार्यक्रम अधिकृत रिता सुवेदीले सहजीकरण गर्नुभएको तालिममा सैद्धान्तिक तथा प्रयोगात्मक कक्षाहरू सञ्चालन गरिएको थियो ।

तालिममा अध्यक्ष तुइलाल श्रेष्ठले सहकारी संस्थाको सम्पत्ति, पुँजी तथा दायित्वको प्रभावकारी व्यवस्थापनका लागि आवश्यक ज्ञान र सीप अभिवृद्धि गर्ने उद्देश्यले तालिम आयोजना गरिएको बताउनुभएको थियो । तालिमबाट प्राप्त ज्ञानले संस्था अझ सुरक्षित, सक्षम र व्यवस्थित बन्न सहयोग पुग्ने विश्वास व्यक्त गर्नुभयो ।

साकोसका उपाध्यक्ष महेन्द्र कुमार जोशी, सचिव पृथ्वीराम श्रेष्ठ, कोषाध्यक्ष सुदिप श्रेष्ठ, सञ्चालक सदस्यहरू तथा लेखा सुपरिवेक्षण समिति, शिक्षा तथा स्वास्थ्य उपसमिति र कर्मचारीहरूको उपस्थिति रहेको थियो । तालिममा सञ्चालक, सल्लाहकार, सदस्य तथा शेयर सदस्यहरु गरि १०० जनाको सहभागिता रहेको थियो ।