दाङ ।  नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी क्षेत्रमा सुशासन, दिगोपन तथा वित्तीय अनुशासन प्रर्बद्धन गर्ने उद्देश्यले सञ्चालन गर्दै आएको नियमित निरीक्षण तथा अनुगमन (स्क्यान) कार्यक्रम अन्तर्गत सहयोगी बचत तथा ऋण सहकारी संस्था लिमिटेड मा असार २ गते स्थलगत सुपरिवेक्षण सम्पन्न गरेको छ ।

सुपरिवेक्षणको मुख्य उद्देश्य सहकारी संस्थाहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड तथा कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तीकरणलाई प्रोत्साहन गर्नु तथा बचतकर्ताको विश्वास अभिवृद्धि गर्नु रहेका छ ।

सुपरिवेक्षणका क्रममा संस्थाको पुँजी पर्याप्तता अनुपात, ऋण व्यवस्थापन, सदस्यता प्रणाली, आन्तरिक सुशासन प्रणाली, लेखा प्रणाली, व्यवस्थापन सूचना प्रणाली (MIS)  अद्यावधिक, सम्पत्ति शुद्धीकरण निवारण (AML/CFT) सम्बन्धी व्यवस्था र भाखा नाघेका ऋण असुलीको अवस्थाको विस्तृत मूल्यांकन गरिएको थियो ।

बचत तथा ऋण कारोबार, लेखापरीक्षण, लगानी नीति, सेवा–सुविधा, सदस्य सहभागिता, नेतृत्वको पारदर्शिता तथा निर्णय प्रक्रिया लगायतका पक्षहरूको समेत समग्र समीक्षा गरिएको थियो ।

सुपरिवेक्षण कार्यक्रममा संस्थाका अध्यक्ष डिलाराम बिष्ट, उपाध्यक्ष लाल बहादुर के.सी., सचिव तथा कार्यदल संयोजक दुर्गा प्रसाद शर्मा, कोषाध्यक्ष पहल बहादुर रोकाहा तथा सञ्चालक समिति र व्यवस्थापनका पदाधिकारीहरूको उपस्थितिमा नेफ्स्कूनका कार्यक्रम अधिकृत प्रबिण अधिकारी ले स्थलगत सुपरिवेक्षण सम्पन्न गर्नुभएको थियो ।