नवलपरासी । कावासोती नगरपालिका–२, नवलपरासी स्थित पौरखी बचत तथा ऋण सहकारी संस्था लिमिटेडमा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) द्वारा सञ्चालित नियमित निरीक्षण तथा अनुगमन (स्क्यान) कार्यक्रम अन्तर्गत स्थलगत सुपरिवेक्षण सम्पन्न भएको छ ।

सहकारी क्षेत्रको पारदर्शिता, उत्तरदायित्व तथा सदस्य हितको सुनिश्चितताका लागि नेफ्स्कूनले सहकारी संस्थाहरूमा स्थलगत सुपरिवेक्षण कार्यक्रम प्रभावकारी रूपमा सञ्चालन गर्दै आएको छ । संस्थाको निर्णय प्रक्रिया, नेतृत्वको पारदर्शिता, उत्तरदायित्व र सदस्य सहभागिताको अवस्था मूल्यांकन गर्नुका साथै प्रविधिमा आधारित सदस्य सूचना प्रणालीको अधिकतम प्रयोगमार्फत जोखिम विश्लेषण गरी जोखिम न्यूनीकरणका उपायहरूको खोजी गर्नु सुपरिवेक्षणको उद्देश्य रहेको छ ।

सुपरिवेक्षणका क्रममा संस्थाको बचत, ऋण, लेखापरीक्षण, लगानी तथा आर्थिक कारोबारको वास्तविक अवस्था मूल्यांकन गरिएको थियो । साथै सदस्यहरूले प्राप्त गर्नुपर्ने सेवा–सुविधा, लाभांश वितरण, समावेशी सहभागिता तथा संस्थाभित्र हुन सक्ने त्रुटि, आर्थिक जोखिम र व्यवस्थापकीय सुधारका पक्षहरूको समेत अध्ययन गरिएको थियो ।

नेफ्स्कूनका कार्यक्रम अधिकृत श्यामराजा तिमल्सिनाद्वारा सम्पन्न सुपरिवेक्षण कार्यक्रममा संस्थाका अध्यक्ष, व्यवस्थापक तथा कर्मचारीहरूको सहभागिता रहेको थियो ।