सुनसरी । सुनसरीको बर्जु गाउँपालिका–अमाहिबेल्हा स्थित प्रगति बचत तथा ऋण सहकारी संस्था लिमिटेड मा व्यवसाय विकास सेवा (BDS) कार्यक्रम सञ्चालन कार्यविधि निर्माणसम्बन्धी कार्यशाला श्रावण ८ गते सम्पन्न भएको छ ।

साकोसका अध्यक्ष चन्दन कुमार चौधरीको अध्यक्षतामा तथा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोगमा आयोजित कार्यशालामा व्यवसाय विकास सेवा कार्यक्रम सञ्चालन कार्यविधि निर्माण गरिएको हो ।

सहकारी ऐन, २०७४ (संशोधनसहित) को दफा २८ ले प्रदान गरेको आन्तरिक कार्यविधि निर्माणसम्बन्धी व्यवस्थाअनुसार सदस्यहरूले सञ्चालन गरिरहेका उद्योग, व्यवसाय, कृषि, पशुपालन तथा प्रशोधन (प्रोसेसिङ) क्षेत्रका गतिविधिलाई व्यवस्थित र प्रभावकारी बनाउन यो कार्यविधि तयार गरिएको संस्थाले जनाएको छ ।

कार्यविधिअनुसार सहकारीमा व्यवसाय सेवा डेस्क स्थापना गरी सदस्यहरूलाई व्यवसाय विकासका पाँच आधार : इच्छाशक्ति, स्थान, प्रविधि, पूँजी र बजारलाई केन्द्रमा राख्दै निरन्तर व्यावसायिक परामर्श, वित्तीय पहुँच तथा बजार सञ्जालमा प्राविधिक सहजीकरण उपलब्ध गराइनेछ । यसमार्फत सदस्यहरूलाई दिगो, प्रतिस्पर्धी र सफल उद्यमी बनाउन सहयोग पुग्ने विश्वास साकोसले गरेको छ ।

कार्यक्रमले “उत्पादनदेखि उपभोक्तासम्म” तथा “सेवादेखि ग्राहकसम्म” को सम्पूर्ण प्रक्रियामा प्राविधिक तथा सहयोगात्मक सेवा प्रदान गर्दै सदस्यहरूको लगानीलाई थप उत्पादक, व्यावसायिक र नतिजामूलक बनाउने लक्ष्य राखेको छ । साथै, ऋणको समयमै भुक्तानी सुनिश्चित गर्नुका साथै उद्यमशीलता विकास, साना तथा मझौला व्यवसायको क्षमता अभिवृद्धि, रोजगारी सिर्जना र स्थानीय आर्थिक विकासमा समेत योगदान पुग्ने अपेक्षा गरिएको छ ।

कार्यशालामा संस्थाका कोषाध्यक्ष दयानन्द चौधरी, सञ्चालक सदस्य ताराचन्द्र चौधरी, कार्यकारी प्रमुख उमेश कुमार चौधरी तथा कर्मचारीहरूको उपस्थिति रहेको थियो ।

श्रावण ७ र ८ गते भएको निर्माण कार्यशाला नेफ्स्कूनका वरिष्ठ अधिकृत भरत प्रसाद न्यौपाने र कार्यक्रम अधिकृत मुकेश दाहालले सहजीकरण गर्नुभएको थियो ।

कार्यक्रमको समापनमा अध्यक्ष चौधरीले व्यवसाय विकास सेवा कार्यक्रमले सहकारीका सदस्यहरूको जीवनस्तरमा सकारात्मक सुधार ल्याउनुका साथै उनीहरूलाई थप व्यावसायिक र आत्मनिर्भर बनाउन महत्वपूर्ण भूमिका खेल्ने विश्वास व्यक्त गर्नुभएको छ ।