काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का १५ जना अधिकृतस्तरका कर्मचारीहरूको क्षमता अभिवृद्धि गर्ने उद्देश्यले श्रावण ८ गते उद्यम–उद्यमी म्याट्रिक्स तथा नक्साङ्कन सम्बन्धी अनुशिक्षण कार्यक्रम सञ्चालन गरेको छ ।

उद्यम विकास तथा प्रवद्र्धनका कार्यक्रमलाई अझ प्रभावकारी, व्यवस्थित र परिणाममुखी बनाउने उद्देश्यले आयोजित अनुशिक्षणमा उद्यमी छनोट प्रक्रिया, व्यवसायको प्रारम्भिक छनोट, सम्भावित उद्यमीको पहिचान तथा छनोटका आधार, उद्यम–उद्यमी म्याट्रिक्सको प्रयोग, नक्साङ्कन प्रक्रिया तथा फिल्डमा यसको व्यावहारिक प्रयोगका विषयमा विस्तृत जानकारी प्रदान गरिएको थियो ।

कार्यक्रममा उद्यमी छनोट गर्दा अपनाउनुपर्ने मापदण्ड, स्थानीय स्रोत–साधनको पहिचान, बजारको सम्भाव्यता विश्लेषण, व्यवसाय सञ्चालनका अवसर तथा चुनौती, लक्षित समूहको पहिचान र उद्यम विकासका विभिन्न चरणबारे छलफल गरिएको थियो । साथै, उद्यम प्रवद्र्धनका कार्यक्रमलाई प्रभावकारी रूपमा कार्यान्वयन गर्न कर्मचारीहरूको भूमिका, समन्वय तथा व्यावसायिक दक्षता अभिवृद्धि गर्नुपर्ने विषयमा समेत जोड दिइएको थियो ।

कार्यक्रमको सहजीकरण नेफ्स्कूनका वरिष्ठ अधिकृत नविन राज दाहालले गर्नुभएको थियो । उहाँले उद्यम–उद्यमी म्याट्रिक्स र नक्साङ्कनले सम्भावित उद्यमीको वैज्ञानिक तथा वस्तुगत मूल्याङ्कन गर्न सहयोग पु¥याउने, उपयुक्त व्यवसाय छनोटमा सहजता ल्याउने तथा उद्यम विकास कार्यक्रमको प्रभावकारिता बढाउने बताउनुभएको थियो ।

अनुशिक्षणमा सहभागी अधिकृतहरूले सिकाइलाई आगामी कार्यक्रम तथा फिल्डस्तरीय कार्यसम्पादनमा प्रयोग गर्ने प्रतिबद्धता व्यक्त गरेका थिए । यस्ता क्षमता अभिवृद्धिमूलक कार्यक्रमले कर्मचारीहरूको व्यावसायिक दक्षता विकास गर्नुका साथै उद्यम प्रवद्र्धनसम्बन्धी सेवाको गुणस्तर अभिवृद्धि गर्न महत्वपूर्ण योगदान पुग्ने विश्वास व्यक्त गरिएको थियो ।