काठमाडौं, २४ भदौ । कर्मचारीहरुको ज्ञान, मनोभावना र सीप (कास) को उचित सम्मिश्रण संस्थागत सबलताको द्योतक भएकाले त्यसको समयसापेक्ष विकासका लागि नेपाल बचत तथा ऋण केन्द्रीय सहकारी संघ लि.नेफ्स्कूनले प्रविधिमैत्री प्रशिक्षणलाई बिशेष जोड दिएको छ । चालु आर्थिक वर्षमा सञ्चालन गरिने कार्यक्रमहरु मात्र नभई यो वर्ष संघले ४ वर्षे व्यावसायिक रणनीतिक योजना समेत तर्जुमा गरेको अवस्थामा  कर्मचारीहरुलाई त्यस सम्बन्धमा प्रशिक्षित गर्ने उद्देश्यसहित आजबाट ४ दिने भर्चुअल तालिम शुरु गरिएको छ । 

तालिममा रणनीतिक योजनाका अन्तर्वस्तुहरुसँगै कर्मचारीहरुको व्यक्तिगत र व्यावसायिक सीपमा निखार ल्याउने विषयमा आन्तरिक र बाह्य प्रशिक्षकहरुद्धारा सत्रहरु सञ्चालन गरिने छ । नेफ्स्कूनका अध्यक्ष परितोष पौड्यालले अवधारणा, विषयवस्तु र सन्दर्भ (थ्री सी) का दृष्टिकोणबाट तालिम अत्यन्तै महत्वपूर्ण हुने दाबी गर्नुभयो ।

कर्मचारीहरुको दक्षता विकासका लागि उपयोगी र सान्दर्भिक तालिमहरुलाई महत्वका साथ सञ्चालन गर्दै आएको नेफ्स्कूनले कोभिड–१९ को संक्रमण स्तरलाई ध्यानमा राखी अभौतिक माध्यमबाट तालिम सञ्चालन गरेको हो । ४ दिने तालिम
संस्थाले अवलम्बन गरेको ध्येय, परिकल्पना, लक्ष्य र गतिविधिहरुलाई आन्तरिकीकरण गर्ने र कार्यपरिणति दिने माध्यम भनेकै कर्मचारीहरु भएकाले तालिम आयोजना गरिएको अध्यक्ष पौड्यालले बताउनुभयो ।

अहिलेको संकटपूर्ण अवस्थामा देशभर खटिएका नेफ्स्कूनका कर्मचारीहरुबीच भौतिक भेटको सम्भावना नभएकाले भर्चुअल तालिमले अनुभव आदान प्रदान गर्ने, सिक्ने र अवस्था विश्लेषण गर्ने मौका समेत उपलब्ध गराउने दाबी गर्नुहुन्छ संघका अध्यक्ष पौड्याल । 

“शाखा व्यस्थापकहरुको क्षमता अभिबृद्धि तालिम” मा संघका फिल्ड इन्चार्जहरु र विभिन्न शाखामा कार्यरत अधिकृतहरु गरी ३७ जना सहभागी छन् । केही दिनअघि मात्रै संघले सहायक स्तरका कर्मचारीहरुलाई समान विषयवस्तुको तालिम प्रदान गरिसकेको छ ।

अध्यक्ष पौड्यालले कर्मचारीको कामको परिक्षण उनीहरुको संवेदशीलताबाट गरिने भन्दै आन्तरिक र बाह््य व्यक्तित्व विकासमा बिशेष सजगता अपनाउन आग्रह गर्नुभयो । उच्च व्यवस्थापकीय सीप सहितको कुशल कर्मचारी सधै नेफ्स्कूनको खोजी भएको बताउँदै उहाँले त्यसमा कुनै सम्झौता नहुने स्पष्ट पार्नुभयो । 

कोषाध्यक्ष दीपक पनेरुले कोभिड महामारीको विषम् परिस्थितिका कारण योजनाबद्ध कार्यक्रमहरु प्रभावित भइरहेको समयमा पनि नेफ्स्कून कर्मचारीहरुको निरन्तरको मेहनतबाट सदस्य सेवा निरन्तरता प्रभावकारी भइरहँदा कर्मचारीहरुप्रति गर्वको महशुस भएको बताउनुभयो । संघका योजना तथा कार्यक्रम कार्यान्वयन गर्ने तहमा फिल्ड व्यवस्थापकहरुको भूमिका उच्च रहने भन्दै स्थानीयताको अनुकूलतामा छलफल, वैठक र योजना निर्माण गरी प्रभावकारी कार्यान्वयनका लागि अनुरोध गर्नुभयो । 

तालिमको पहिलो सत्रमा संघका प्रशासन तथा व्यवसाय विभाग प्रमुख सञ्जयराज तिमिल्सीनाले तालिम सहजीकरण साथै तालिम आचारसंहिता निर्माण सम्बन्धी जानकारी गराउनुभएको थियो । 

नेफ्स्कूनका कामु प्रमुख कार्यकारी अधिकृत प्रकाश प्रसाद पोखरेलले संघको रणनीतिक कार्यदिशा र आगामी मार्गचित्र सम्बन्धी प्रशिक्षण दिनुभएको थियो । संघको ५ औं रणनीतिक योजना निर्माणमा सञ्चालक समिति, उच्च व्यवस्थापन, विशिष्ट अर्थ तथा योजनाविद्हरु (रामेश्वर खनाल र दीपेन्द्र बहादुर क्षेत्री) को महत्वपूर्ण योगदान रहेको उहाँले जानकारी गराउनुभयो । योजनामा विश्वव्यापी मुद्दाहरुको सम्बोधनका लागि अन्तर्राष्ट्रिय श्रम संगठन (आइएलओ) को परामर्श सहयोग समेत रहेको छ । यसवर्षको संघको नारा  “सामनाशक्ति विकास का लागि सद्भावपूर्ण सहकार्य” रहेको अवगत गराउँदै कामु प्रमुख कार्यकारी अधिकृत पोखरेलले  महामारीको सामना एकल विधिबाट होइन अभियान सँगको सहकार्यमार्फत गर्न सकिने उहाँले प्रष्ट्याउनुभयो । 

जलवायु परिवर्तनलाई अनुकूलनमा बदल्न, गरिबी, असमानता अन्त्य गरी समुदायको हित गर्न र युवा सहभागिताका लागि नवीनतम प्रविधि हस्तान्तरण का विषयमा सरोकारवालाहरुसँगै सहकारीहरुबीच पनि सहकार्यको अपरिहार्यतामा उहाँले जोड दिनुभयो । रणनीतिक योजनाले तय गरेका परिकल्पना र ध्येयलाई वास्तविकतमा बदल्दै आगामी दिशा तय गर्न फरक ढंगको सोचबाट सहकारी अभियानबीचको सहकार्य महत्वपूर्ण हुने विषय कामु प्रमुख कार्यकारी अधिकृत पोखरेलको प्रस्तुतिले समेटेको थियो ।

त्यसैगरी ४ बाइ ७ को म्याट्रिक्स अन्तर्गत आबद्धता तथा करारीय ऐक्यवद्धता, स्रोतहरुमा पहूँच, कार्य सञ्चालनमा स्तरीयता, स्वनियमन र अनुशासनलाई अव साकोस सञ्जाल व्यवस्थापनसँग एकाकार गरेर अगाडि बढ्ने विषयहरु प्रस्तुतिमा अटाएका थिए । रणनीतिक योजनाका आयामहरु र साझा सञ्जालको रणनीतिक क्षेत्र र कार्यदिशा सम्बन्धमा कामु प्रमुख कार्यकारी अधिकृत पोखरेले समेट्नुभएको थियो ।  

प्रत्येक दिनको तालिम समाप्तिपछि सहभागीहरुबाट तालिमको संक्षेपीकरण गरिने छ भने तालिम प्रतिवेदन तयारीका लागि समूह समेत निर्माण गरिएको छ ।