काठमाडौं । नेफ्स्कूनले अन्तर्राष्ट्रिय श्रम संगठन (आइएलओ) को नेपालस्थित कार्यालयको वित्तीय सहयोगमा सहकारीमार्फत उद्यमशीलता विकासको कार्यक्रम अघि बढाएको छ । जसअन्तर्गत नेफ्स्कून आबद्ध प्रारम्भिक संस्थाका सदस्यहरुलाई विषय विज्ञहरुको सहजिकरणमा व्यवसाय विकास तालिम प्रदान गर्नुका साथै उनीहरुको उद्यममा प्रत्यक्ष सहयोग समेत उपलब्ध गराउने योजना तर्जुमा गरेको छ । खासगरी कोभिड–१९ ले उब्जाएका समस्याहरु समाधानका लागि पनि उद्यमशीलता, रोजगारी सृजना, आत्मनिर्भर व्यवसाय, कृषिमा व्यावसायिकीकरण जस्ता विषयहरु उठिरहेको सन्दर्भमा वित्तीय सहकारीहरुको एक मात्र अभिभावक निकायले त्यसतर्फ आइएलओ नेपालसँगको रणनीतिक साझेदारीमा सुरुवाती कदमका रुपमा व्यवसाय विकास तालिम सञ्चालन गरेको हो । 

उद्यमशीलता विकास तथा व्यवसाय व्यवस्थापन विषयक ३ दिने तालिममा ललितपुरको देवीचौर–४ स्थित देवीचौर बचत तथा ऋण सहकारी संस्थाका २५ जना सदस्यहरु सहभागी हुनुहुन्थ्यो । अधिकांश महिला सहभागी तालिममा व्यवसाय, उद्यम, उद्यमशीलता, कृषिको व्यावसायिकीकरण, अनलाइन बजारीकरण, सञ्जाल सम्बन्ध आदि विविध विषयमा नेफ्स्कूनका बरिष्ठ अधिकृत द्वय प्रेमनाथ वाग्ले र बल्लभ तिमल्सिनाले सहजिकरण गर्नुभएको थियो । 

यसैबीच, आज आयोजित तालिम समापन कार्यक्रममा नेफ्स्कूनका सदस्य सेवा विभाग प्रमुख दुर्गा प्रसाद ढकालले उद्यमशीलता विकास अबको अपरिहार्यता भएको बताउनुभयो । आयातमा भरपर्नुपर्ने अवस्थाबाट मुक्ति पाउन उद्यमशीलता विकास गर्नुपर्ने भन्दै ढकालले उपलब्ध स्रोत साधनलाई अधिकतम उपयोग गर्ने सोच विकास गर्न यस किसिमका तालिम प्रभावकारी हुने दाबी गर्नुभयो । यस्तो तालिमले कसरी खेती वा व्यवसाय गर्ने, कुन समयमा गर्ने, बजारसँगको सम्बन्ध कसरी विस्तार गर्ने, मुनाफा वृद्धि कसरी गर्ने जस्ता विषयहरुमा सही जानकारी दिने दाबी उहाँले गर्नुभयो । उहाले सहकारी समुदायको साथी भएकाले समुदायका सदस्यहरुलाई उद्यमी बनाउन लागि पर्ने बताउनुभयो ।

नेफ्स्कूनका बरिष्ठ अधिकृत नवीनराज दाहालले नेफ्स्कूनले उद्यमशीलता विकासका लागि प्राविधिक सहजिकरण निरन्तर गर्ने भन्दै समयको माग अनुसार व्यावसायिक सोचका साथ अघि बढ्न आग्रह गर्नुभयो । केही गर्छु भन्ने संस्था र त्यसमार्फत सहकारीका सदस्यहरुलाई सहयोग गर्न नेफ्स्कून सदा तत्पर रहेको दाबी उहाँले गर्नुभयो । नेफ्स्कूनले यस्तै विषयको तालिम केही दिनअघि भक्तपुरस्थित एक बचत तथा ऋण सहकारी संस्थाका २५ जना सदस्यलाई पनि प्रदान गरेको थियो ।