काठमाडौं । रुपन्देहीका दुई वटा बचत तथा ऋण सहकारी संस्थाबीच आज एकीकरण भएको छ ।  देवदहस्थित कोलिय देवदह बचत तथा ऋण सहकारी संस्था लि. र मायादेवी महिला विकास बचत तथा ऋण सहकारी संस्था लि. बीच आज एकीकरण भएको हो । आज आयोजित एकीकरण घोषणा कार्यक्रममा कोलिय देवदह साकोसका अध्यक्ष शुभकान्त न्यौपाने र मायादेवी महिला विकास साकोसकी अध्यक्ष गौमती बुढाथाकीले दुई फरक–फरक गाग्रीबाट एउटै गाग्रीमा सिक्का खसालेर एकीकरणलाई औपचारिकता दिनुभएको हो ।  

एकीकरण घोषणा कार्यक्रममा बोल्दै जिल्ला सहकारी संघ रुपन्देहीका अध्यक्ष भिम तुलाचनले जवाफदेहिता र ईमान्दारी सहकारी संञ्चालनको प्रमुख तत्व भएको बताउनु भयो । उहाँले सहकारीहरुलाई सहकारी मूल्य मान्यताहरुको आधारमा सञ्चालन गर्न सुझाउनु भयो । अध्यक्ष तुलाचनले कर्ममा विश्वास गरेर ईमान्दारीपूर्वक काम गर्न सहकारीका सञ्चालकहरुलाई आग्रह गर्नु भयो । सोही कार्यक्रममा बोल्दै राष्ट्रिय सहकारी बोर्डका सञ्चालक प्रकाश अर्यालले सहकारीलाई जीन्दगीको सारथीका रुपमा विकास गर्नु पर्ने बताउनु भयो । हरेक दुःख सुखमा साथ दिने वित्तीय साथीका रुपमा सहकारीलाई स्थापित गर्दै वित्तिय आवश्यकता पुरा गर्नु पर्नेमा उहाँले जोड दिनु भयो । प्रदेश बचत तथा ऋण सहकारी संघ लुम्बिनीका अध्यक्ष कृष्ण नेपालले सहकारीहरुलाई सदस्यमुखी बनाउनु पर्ने बताउनु पर्नेमा जोड दिनु भयो । जिल्ला सहकारी संघ रुपन्देही सचिव टिका गौतमले सहकारीहरुले आर्थिक सामाजिक रुपान्तरणमा काम गर्नु पर्ने बताउनु भयो ।

सहकारीका सल्लाकार संयोजक ऋषिराम सापकोटाले सहकारीका संञ्चालकहरुलाई प्रशिक्षणको व्यवस्था गर्नु पर्ने बताउनु भयो । बचत तथा ऋण सहकारी संघ रुपन्देही अध्यक्ष प्रकाश भट्टराईले सहकारीहरुलाई मान्यतामा आधारीत बनाउनु पर्ने बताउनु भयो । २०६२ फागुन २६ गते डिभिजन सहकारी कार्यालय रुपन्देहीमा दर्ता भएको सहकारीमा ३ सय ५३ जना सेयर सदस्यहरु रहेका छन भने संस्थागत पुँजि ३ लाख ५७ हजार ४ सय १४ रुपैयाँ रहेको छ । कोलिय देवदह साकोस रुपन्देहीकै ठुलो मध्येको एक प्रोबेसन ब्राण्ड प्राप्त सहकारी हो । एकीकरण पश्चात सहकारीको नाम कोलिय देवदह सहकारी नै रहनेछ । कर्मचारीहरु समायोजन हुने, सेयर पुँजी एकीकृत गरीने र कोलिय देवदह साकोसको केन्द्रिय कार्यालय नै कार्यालय रहने एकता संयोजन समितिका संयोजक कृष्ण प्रसाद पौडेले जानकारी दिनु भयो । एकीकरण पश्चात सहकारीलाई थप प्रभावकारी ढंगले अगाडि वढाउने कोलिय देवदह सहकारीका सचिव कृष्ण राज पौडेलले बताउनु भयो ।