काठमाडौं । भक्तपुर जिल्ला बचत तथा ऋण सहकारी संघ लि.आगामी शनिबारबाट सुर्यविनायक नगरपालिका ८ ईतबुँस्थित आफ्नै नवनिर्मित भवनमा सर्ने भएको छ । अन्तर्राष्ट्रिय सहकारी दिवसको अवसर पारेर आगामी शनिवार अर्थात् असार १९ गते जिल्ला संघ आफ्नो भवनमा सर्ने तयारीमा रहेको छ । यसअघि बैशाख २१ गते स्थापना दिवसमा सर्ने योजना रहेपनि कोभिडका कारण पर धकेलिएको हो । 

संघका अध्यक्ष कृष्ण गोविन्द लाखाजुले आफ्नै भवनमा सर्न पाउनु खुसीको कुरा भएको बताउँदै यसले ‘दिगो र आत्मनिर्भर संघ’ को सन्देश सदस्य र अभियानसँगै सरोकारवालाहरुमाझ प्रवाह हुने दाबी गर्नुभयो । ‘जिल्ला संघको परिकल्पनामा नै दिगो सहकारीको लागि बचत संघ भनिएको छ, ’ अध्यक्ष लाखाजुले भन्नुभयो, ‘एक अर्थमा संघको आफ्नै भवन निर्माण हुनु पनि भक्तपुरको बचत ऋण सहकारी अभियान दिगो हुनु सरह हो ।’

संघका व्यवस्थापक बालकृष्ण धोजुका अनुसार ३ आना २ पैसा २ दाम क्षेत्रफलमा फैलिएको जग्गामा साढे ३ तल्ले भवन निर्माण गरिएको हो । भवनमा २ वटा सटर सहित करिब ४० जना अटाउने तालिम कोठा, बैठक कक्ष, कार्यालय प्रयोजनका लागि कोठाहरु बनाइएको छ । संघले करिब ३ वर्ष अघि लिएको जग्गामा भवन निर्माण गरेको व्यवस्थापक धोजुले साकोस आवाजलाई बताउनुभयो । सबै कोठाहरु संघका लागि नै प्रयोग गरिने छ । उहाँले भवन निर्माणको अनुमानित रकम ९३ लाख भएपनि त्यो भन्दा कममै निर्माण सम्पन्न भएको बताउनुभयो ।

अध्यक्ष लाखाजुले आफ्नै स्रोतमा भवन निर्माण समेत सम्पन्न भएको दाबी गर्नुभयो । उहाँले संघका पूर्व अध्यक्ष राधेश्याम सुवालले १ लाख रुपैयाँ सहयोग गर्ने प्रतिबद्धता व्यक्त गर्नुभएको छ भने जग्गा खरिददेखि भवन निर्माणको दौरान १ सय १८ वटा जिल्लास्थित संस्थाहरुले प्रति संस्था ५ हजार रुपैयाँका दरले सहयोग पुर्याएको जानकारी गराउनुभयो । यस्तै, करिब २५ वटा संस्थाहरुले २५ देखि ५० हजारका दरले भवन निर्माण कार्यमा सहयोग गरेको बताउनुभयो । उहाँहरुको नाम शिला लेखन गरिनेछ । त्यसबाहेक संस्थाको जगेडा कोषले भ्याउने गरी भवन निर्माण सम्पन्न भएको अध्यक्ष लाखाजुले बताउनुभयो । संघको एउटा सेवा केन्द्र थिमिमा अवस्थित छ ।