रुपन्देही । तिलोत्तमा नगरपालिका वार्ड नं. ३ मा अवस्थित सामूहिक विकास बचत तथा ऋण सहकारी संस्था लि. र तिलोत्तमा नगरपालिका वार्ड नं. ७, भलवारीमा अवस्थित कल्पवृक्ष बचत तथा ऋण सहकारी संस्था लि. का बीचमा एकिकरण सम्वन्धमा आज एक कार्यक्रमका बीच प्रारम्भिक सहमति पत्रमा हस्ताक्षर भएको छ । 

सामूहिक विकास साकोसका अध्यक्ष सुरेन्द्र कुमार वर्माको अध्यक्षतामा सम्पन्न एकीकरण सम्झौता कार्यक्रममा सामूहिक विकास बचत तथा ऋण सहकारी संस्थाको तर्फवाट एकीकरण कार्यदल संयोजक लक्ष्मण ज्ञवाली र कल्पवृक्ष साकोसको तर्फवाट सो साकोसका अध्यक्ष एवं कार्यदल संयोजक वेचु प्रसाद चौधरीले प्रारम्भिक सहमति पत्रमा हस्ताक्षर गर्नुभएको थियो । 

कार्यक्रममा वोल्दै कल्पवृक्ष साकोसका अध्यक्ष चौधरीले दोहोरो सदस्यता अन्त्य गरी सबल र सुशासित संस्था निर्माणका लागि एकीकरणको आवश्यकता महसुश गरी प्रक्रिया अगाडि बढाइएको बताउनुभयो । यसैगरी उक्त कार्यक्रममा सामूहिक विकास साकोसका अध्यक्ष सुरेन्द्र कुमार वर्माले सहकारी ऐन अनुसार दोहोरो सदस्यता एवं प्रभावकारी सञ्चालनका लागि एकीकरण फलदायि हुने विश्वास व्यक्त गर्नुभयो । साथै उहाँले अब छिट्ट नै यस क्षेत्रका धेरै सहकारी संस्थाहरुलाई एकीकरण अभियानमा जोड्दै लैजाने नीति संस्थाले लिएको जानकारी गराउनुभयो । हालसालै मात्र सामूहिक विकास साकोस र मणिप्रभा साकोसबीच एकिकरण सम्वन्धमा प्रारम्भिक सहमति भएको थियो । 

२०५० सालमा स्थापीत सामूहिक विकास साकोसमा हाल ८ हजार शेयर सदस्य रहेका छन् भने संस्थाको कुल पूँजी २ अर्व ८० करोड रहेको छ । संस्थाले गत आर्थिक वर्षमा ६ करोड ८६ लाख मुनाफा आर्जन गर्न सफल भएको छ ।