काभ्रे । बागमती प्रदेश बचत तथा ऋण सहकारी संघ लिमिटेड (वागमती प्रोस्कून) को आगामी चार वर्षका लागि व्यावसायिक रणनीतिक योजना निर्माण कार्याशाला गोष्ठी सम्पन्न भएको छ । 

काभ्रेपलाञ्चोकमा भाद्र ११ र १२ गते आयोजित कार्यशालाको उद्घाटन राष्ट्रिय सहकारी महासंघका अध्यक्ष मिनराज कंडेलले गर्नुभएको थियो । प्रमुख अतिथि अध्यक्ष कंडेलले छोटो समयमा प्रदेश बचत संघले उल्लेख्य प्रगति गरेको र अब निर्माण हुन लागेको रणनीतिक व्यावसायिक योजनाले व्यावसायिक र क्षमतावान संघ निर्माण हुनेमा विश्वास व्यक्त गर्नुभएको थियो । उहाँले बागमती प्रदेशको बचत तथा ऋण सहकारी संघसंस्थाहरुको व्यावसायिकीकरण गर्दै सुरक्षित साकोस निर्माणमा संघले महत्वपूर्ण भूमिका खेल्ने अपेक्षा राखेको बताउनुभयो ।

कार्यक्रममा विशेष अतिथि वागमती प्रदेश सहकारी विकास बोर्डका उपाध्यक्ष नारायण देवकोटाकोले सहकारी मार्फत साना व्यावसायिक परियोजनामा जोड दिनु पर्ने उल्लेख गर्दै प्रदेश सहकारी विकास बोर्ड र बागमती प्रदेश बचत तथा ऋण सहकारी संघ बीच साझेदारी र समन्वय गर्न विकास बोर्ड तयार रहेको विचार व्यक्त गर्नुभयो । 

कार्यक्रम समापन समारोहका प्रमुख अतिथि नेफ्स्कूनका अध्यक्ष परितोष पौडेलले प्रदेश बचत तथा ऋण सहकारी संघले स्थापनाको पहिलो वर्षमा नै उत्कृष्ट रणनीतिक व्यवसायिक योजना निर्माण गरेकोमा बधाई दिनुभयो । बचत तथा ऋण अभियानमा नेफ्स्कूनले नेतृत्वदायी भूमिका खेल्ने र त्यसमा प्रदेश बचत तथा ऋण सहकारी संघको सहयोग आवश्यक रहेको उल्लेख गर्नुभयो । सदस्य संघसंस्थाहरुको क्षमतामा सुधार ल्याउन संघ लाग्नुपर्नेमा उहाँले जोड दिनुभएको थियो । 

कार्यक्रममा बागमती प्रदेश बचत तथा ऋण सहकारी संघ लि. (बागमती प्रोस्कून) को संचालक समिति, लेखा सुपरीवेक्षण समिति र उच्च व्यवस्थापन सहित १७ जनाको को उपस्थिति रहेको थियो । कार्यक्रममा राष्ट्रिय सहकारी महासंघले आर्थिक तथा प्राविधिक सहयोग रहेको थियो । 

संघका अध्यक्ष उद्धव सापकोटाको अध्यक्षतामा सम्पन्न कार्यशालाले आगामी ४ वर्षमा  २ हजार २५ सदस्य र कुल ९ अर्ब सम्पत्ति पुर्याउने लक्ष्य लिएको छ ।