काठमाडौं । जिल्ला सहकारी संघ लि. काठमाडौंको आयोजना र संघकै महिला सशक्तिकरण उपसमितिको समन्वयमा आज संघको सभाहल बिजुलीबजारमा लैङ्गिक हिंसा विरुद्धको अभियान विषयक अन्तरक्रिया भएको छ । घरैबाट शुरू गरौं, महिला हिंसा अन्त्य गरौं भन्ने राष्ट्रिय नाराका साथ नोभेम्बर २५ देखि डिसेम्बर १० सम्म सञ्चालनमा रहेको १६ दिने अभियानको समापनसँगै महिला हिंसा विरुद्धको ३ सय ६५ दिने अभियान शुभारम्भ भएको कार्यक्रमका सहभागी बक्ताहरुले बताउनुभएको छ । 

संघका अध्यक्ष ज्ञानबहादुर तामाङ्गले लैङ्गिक हिंसा विरुद्धको अभियानमा प्रत्येक घर घरका सदस्य सचेत भएर परिवर्तन घरबाटै सुरु हुनुपर्ने बताउनुभयो । महिला होस् वा पुरुष आफ्नो मन र मस्तिष्कमा उब्जने कुनैपनि प्रकारको हिंसात्मक गतिविधि र सोचमा सकारात्मक परिवर्तन ल्याउनसके मात्रै लैंङ्गिक हिंसा अन्त्य हुने बिषयको चर्चा गर्नुभयो । उहाँले सहकारीमार्फत महिलाहरुमा आर्थिक सशक्तिकरण र जागरणको सुरुवात भएको साथै सहकारीका क्षेत्रमा नेतृत्व तहमा पनि पहुँच अभिवृद्धि भएको प्रष्ट पार्नुभयो । 

कार्यक्रममा मानव अधिकार रक्षक भोजराज तिमल्सिनाले महिलामाथी हुने विभिन्नखाले हिंसा र कानुनी प्रावधान विषयक कार्यपत्र प्रस्तुत गर्नुभएको थियो । कार्यक्रममा सहभागी सहकारी प्रतिनिधिहरुले प्रस्तुत कार्यपत्र र महिला हिंसा सम्बन्धी कानुनी प्रावधान बारे जिज्ञासा राख्नुभएको थियो । 

नेपाल मानव अधिकार संगठनका केन्द्रीय सदस्य रविनसिंह बस्नेतले आज डिसेम्बर १०, ७३औं अन्तराष्ट्रिय मानव अधिकार दिवसबारे चर्चा गर्दै मानव अधिकारको रक्षा घर घरबाट र पारिवारिक संस्कारबाटै विकास हुनुपर्ने बताउनुभयो । उहाँले जुन घर परिवारमा मानव अधिकारको रक्षा हुन्छ, त्यहाँ लैंङ्गिक हिंसा अन्त्य हुने प्रष्ट पार्नुभयो । 

बागमती प्रदेश बचत संघकी लेखा सुपरीवेक्षण समिति सदस्य रमिला श्रेष्ठ शाक्यले घरघरका महिला दिदीवहिनी, सासु बुहारी, नन्द भाउजु बीचका सोच र व्यवहारमा परिवर्तन साथै सम्बन्ध सुधारको माध्यमबाट घर, समाज र समुदाय हुँदै राष्ट्रिय अभियानलाई नै हिंसा मुक्त बनाउने सोच विकास हुनुपर्ने बताउनुभयो ।  

संघकी सञ्चालक एवम् महिला उपसमिति संयोजक अमरावती महर्जनले सहकारी क्षेत्रमा महिलाको उल्लेख्य सहभागिता रहेको चर्चा गर्दै प्रत्येक सहकारीमार्फत लैंङ्गिक हिंसा विरुद्ध सचेतना कार्यक्रम सञ्चालन गर्नुपर्नेमा जोडदिनुभयो । लैङ्गिक हिंसा अन्त्यका लागि महिला र पुरुष दुवैंको भूमिका उत्तिकै महत्वपूर्ण रहने र दुवैले एक साथ यो १६ दिने अभियानको सन्देशलाई बर्षौबर्षसम्म आत्मसाथ गर्नुपर्ने बताउनुभयो ।

संघका सञ्चालक बीरेन्द्र कुमार बलामी र लेखा सुपरीवेक्षण समिति संयोजक सुमन के.सी. ले लैंङ्गिक हिंसा विरुद्धको अभियानमा ऐक्यबद्धता जनाउँदै कार्यक्रम सफलताको शुभकामना व्यक्त गर्नुभएको थियो । 

कार्यक्रममा सहभागी काठमाडौंका विभिन्न सहकारीका प्रतिनिधिहरुले लैंङ्गिक हिंसा अन्त्यको अभियानमा एकजुट भएर लाग्नुपर्ने र टोलटोलमा सचेतनामुलक कार्यक्रमहरु सञ्चालन गर्नुपर्नेमा जोड दिनुभएको थियो । थोरै संख्याको पछाडि जोडिएको विशाल सञ्जाल भएको सहकारी क्षेत्रले विशेष ध्यानदिन सके लैङ्गक हिंसा विरुद्धको अभियान सार्थक बन्ने विश्वास सहभागी बक्ताहरुले व्यक्त गरेका थिए ।