काठमाडौं । नेफ्स्कून गोंगवु फिल्ड कार्यालयको आयोजनामा आज सञ्जाल समन्वय तथा अन्तरलगानी प्रवर्धन कार्यक्रम सम्पन्न भएको छ । सिते बा अर्गानिक कृषि फर्म टोखामा आयोजित कार्यक्रमको अध्यक्षता नेफ्स्कूनका सञ्चालक सदस्य एवम् फिल्ड व्यवस्थापन उपसमिति संयोजक न्हुच्छे नारायण श्र्रेष्ठले गर्नुभएको थियो । कार्यक्रममा फिल्ड व्यवस्थापन उपसमिति सदस्यहरु शेखर श्रेष्ठ, दिपक कार्की, सत्य नारायण डंगोल, नेफ्स्कूनका सदस्य सेवा विभाग प्रमुख दुर्गा प्रसाद ढकाल, व्यवसाय विभाग प्रमुख राधेश्याम श्रेष्ठ सहित गोंगबु र सामाखुसी क्षेत्रमा सञ्चालित विभिन्न १९ बचत तथा ऋण सहकारी संस्थाबाट २४ जना साकोस प्रतिनिधिहरुको उपस्थिति थियो । 

सञ्जाल समन्वय सम्बन्धमा नेफ्स्कूनका सदस्य सेवा विभाग प्रमुख दुर्गा प्रसाद ढकालले सहजीकरण गर्नुभएको थियो । कार्यक्रममा नेफ्स्कूनका वस्तु तथा सेवा र साकोस सबलीकरणका दुई प्रमुख कार्यक्रम स्तरीकरण र स्थिरीकरण कोष सञ्चालन सम्बन्धमा जानकारी गराइएको थियो । 

नेफ्स्कूनका सञ्चालक एवम् उपसमिति संयोजक श्रेष्ठले सञ्जाल सवलीकरणका निम्ति स्तरीकरण कार्यक्रम आबद्धता, स्थिरीकरण कोषमा सहभागिता, साकोस एकीकरण र अन्तरलगानी प्रवर्धनका कार्यक्रममा जोडिन सहभागीहरुलाई आव्हान गर्नुभएको थियो । 

नेफ्स्कूनद्वारा काठमाडौंको टोखा क्षेत्रमा पहिलो पटक कार्यक्रम भएको प्रति सहभागीहरुले सुखी व्यक्त गर्दै टोखामा नेफ्स्कून सेवा केन्द्र सञ्चालनको माग गर्नुभएको थियो । कार्यक्रम सञ्चालन नेफ्स्कून गोंगबु फिल्ड इन्चार्ज प्रकाश अधिकारीले गर्नुभएको थियो ।