काठमाडौं । राष्ट्रिय सहकारी महासंघकी पहिलो महिला महाप्रबन्धक चित्राकुमारी थाम्सुहाङ्ग सुब्बाद्वारा लिखित पहिलो पुस्तक 'सहकारीमा २५ वर्ष भोगाई र अनुभूति' आज विमोचन गरिएको छ । नेपालका सहकारीहरुको शीर्षस्थ निकाय राष्ट्रिय सहकारी महासंघको २९ औं वार्षिक साधारण सभाको अवसरमा प्रमुख अतिथि भूमि व्यवस्था, सहकारी तथा गरिबी निवारण मन्त्री शशी श्रेष्ठले पुस्तक विमोचन गर्नुभएको थियो । कुमाङ्ग सुब्बाले प्रकाशन गर्नुभएको पुस्तकमा सहकारी महासंघमा सुब्बाको २५ वर्षे यात्रा समेटिएको छ । लेखक सुब्बाले पुस्तक बिक्रीबाट प्राप्त रकमको १० प्रतिशत राष्ट्रिय सहकारी महासंघको सहकारी विकास कोषमा प्रदान गर्ने घोषणा समेत गर्नुभयो ।

महासंघका निवर्तमान अध्यक्ष केशव बडालले निरन्तरता र धैर्यताले सफलतामा पुग्न सकिन्छ भन्ने सन्देश पुस्तकले दिएको बताउनुभयो । उहाँले महासंघको पहिलो महाप्रबन्धक नियुक्ति हुनु अघि उहाँले भोग्नु परेको चुनौतीलाई सुब्बाले रचनात्मक ढंगले प्रस्तुत गर्नुभएको बताउनुभयो । लेखक सुब्बाले भन्नुभयो ‘सहकारी अभियानको विकासक्रमको साक्षी हुँ । नेपालमा सहकारी अभियान शून्यबाट कसरी ७७ जिल्लाका गाउँ गाउँमा पुग्यो । एउटा अभिायनले कसरी सर्वसाधारणको जीवन बदल्यो ? पुस्तकमा समेट्ने कोशिस गरेको छु।’

‘म अभियानको एउटा प्रमुख साझेदार हुँ । सहकारी अभियानले मलाई बदल्यो, मैले आफै सक्रिय भएर धेरै मानिसको जीवन बदल्न सहयोग गरे । यो अभियानले देश बदल्न छ भन्ने मलाई विश्वास जागेको छ ।’ उहाँले पुस्तकको विषयमा बताउँदै भन्नुभयो ।