धादिङ । नेफ्स्कून फिल्ड कार्यालय धादिङको आयोजनामा साकोस कर्मचारीहरुका लागि एक दिवसीय सुरक्षित ऋण परिचालन तथा जोखिम व्यवस्थापन तालिम चैत्र १३ गते सञ्चालन भएको छ । धादिङ फिल्ड कार्यालय व्यवस्थापन उपसमिति सदस्य प्रदिप अधिकारीको अध्यक्षतामा आयोजित तालिमको उद्घाटन  जिल्ला बचत संघ धादिङ का अध्यक्ष नवराज शर्माले गर्नुभएको थियो । 

अध्यक्ष शर्माले साकोसको प्रभावकारी सञ्चालन सुरक्षित ऋण परिचालन र जोखिम रहित वित्तीय व्यवस्थापन रहेको स्पष्ट पार्नुभयो । बचत तथा ऋण सहकारी संस्थाको मूख्य जिम्मेवारी पुँजी निर्माण र पुँजीको प्रभावकारी परिचालन रहेको बताउँदै सहकारीमार्फत सदस्य उद्यमशिलता अभिबृद्धि आवश्यक रहेकोमा उहाँले जोडदिनुभयो । उहाँले भन्नुभयो, सहकारीले सदस्य सशक्तिकरणमा महत्वपूर्ण काम गर्नुपर्छ र गर्न सक्छन् । 

तालिममा धादिङ र गोर्खा जिल्लाका विभिन्न बचत तथा ऋण सहकारी संस्थामा कार्यरत ऋण अधिकृत, ऋण सहायक र ऋण संयोजक गरी ३० जनाको सहभागिता रहेको थियो । 

फिल्ड कार्यालय व्यवस्थापन उपसमिति सदस्य तुलसी प्रसाद अधिकारीले स्वागत मन्तव्य व्यक्त गर्नुभएको उक्त तालिमको सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको थियो भने व्यवस्थापन सहजीकरण फिल्ड इन्चार्ज शम्भू प्रसाद घिमिरेले गर्नुभएको थियो ।