कास्की । पोखरा रोयल बचत तथा ऋण सहकारी संस्था लि. ले दुई दशक यात्रा सफलताका साथ पुरा गरी जेठ ८ गतेबाट २१औं बर्ष प्रवेश गरेको छ । 

दुई दशक यात्रामा पोखरा रोयल साकोसले संस्थागत सुशासन कायम गर्दै वित्तीय रुपमा अब्बल र प्रविधिमैत्री सहकारी संस्थाको पहिचान बनाउन सफल भएको छ ।

सुखी सदस्य र दिगो सहकारी बनाउने परिकल्पनाका साथ अघि बढेको पोखरा रोयलले सहकारी क्षेत्रमा एउटा नेतृत्वदायी संस्थाको रुपमा पहिचान बनाउन सफल भएको छ । ८ हजार ३ सय १३ जना सदस्यहरु माझ सहज वित्तीय उपलब्धता पुर्याउँदै आएको साकोसको कूल सम्पत्ती २ अर्ब १५ करोड रुपैयाँ पुगेको छ । 

संस्थाका अध्यक्ष रुद्र कुमारी गुरुङ्ग र प्रमुख कार्यकारी अधिकृत भीम बहादुर गुरुङ्गले स्थापना दिवसका अवसरमा संयुक्त विज्ञप्ति जारी गर्दै सम्पूर्ण सदस्य, सञ्चालक समिति, कर्मचारी, नियामक निकाय लगायतमा शुभकामना व्यक्त गर्नुभएको छ । विज्ञप्तिमा भनिएको छ, ‘प्रतिस्पर्धी तथा तरल वित्तीय बजार, कोरोना महामारीले तहसनहस बनाएको व्यावसायिक क्षेत्रको अवस्था र विविध समस्याका बावजुद सदस्य सेवा र सहकारी अभियानलाई जीवन्त बनाईराख्न संस्थाले निरन्तर सकारात्मक र अग्रणी भूमिका खेलेको हामीले महशुस गरेका छौं ।’

परिवर्तित समयपरिवेश र सदस्यहरुको मागलाई सम्बोधन गर्दै साकोसले प्रविधिमैत्री वित्तीय सेवामा जोड दिँदै आएको छ । साकोसले एटिएम सेवा, मोबाईल बैंकिङ, क्यूआर कोड, एसएमएस बैंकिङ लगायतका सेवा विस्तार गरेको छ ।

आगामी दिनमा सेवाहरु अझ प्रतिस्पर्धी र सयम सापेक्ष बनाउँदै युवा केन्द्रित, ग्रामिण क्षेत्र केन्द्रित र बैंकिङ पहुँचभन्दा बाहिर भएका नागरिक केन्द्रित सेवा विस्तार गर्ने योजना रहेको विज्ञप्तिमा उल्लेख छ । आगामी वर्ष थप सफलता र सदस्य मुखी कार्यक्रम ल्याउने समेत प्रतिवद्धता साकोसले जनाएको छ । सन्तुष्ट सदस्य, बचतको सुरक्षा, बलियो जगेडा कोष, सुशासनयुक्त र सदस्य केन्द्रित सेवा संस्थाको प्रमुख प्राथमिकता सहित नेपालको अग्रणी र सफल सहकारीको पहिचान बनाउँदै सदस्यहरु माझ निरन्तर सेवामा रहिरहने प्रतिवद्धता विज्ञप्ति मार्फत जाहेर गरिएको छ ।