भक्तपुर । सामूहिक साकोस भक्तपुरले २५औं स्थापना दिवस (रजतवर्ष) को सुअवसरमा असोज २३ गतेदेखि साकोसको नवनिर्मित भवनबाट कारोबार शुभारम्भ गरेको छ । 

भक्तपुर नगरपालिका ३, बोलाछें स्थित साकोसको नव निर्मित भवनमा आयोजित कार्यक्रमको सभाध्यक्ष अध्यक्ष धनेशराज राजोपाध्याय र प्रमुख आतिथ्यता साकोसका संस्थापक सदस्य तथा पूर्व अध्यक्ष राजेश बहादुर श्रेष्ठको प्रमुख आतिथ्यतामा भएको थियो ।

कार्यक्रममा प्रमुख अतिथि श्रेष्ठ र अध्यक्ष राजोपाध्यायले खुत्रुकेमा पैसा जम्मा गरेर संयुक्त रुपमा कारोबार शुभारम्भ गर्नुका साथै संयुक्त रुपमा रजतवर्ष लोगो लोकार्पण गर्नुभएको थियो । 

प्रमुख अतिथि श्रेष्ठले संस्था स्थापना कालका कठिन यात्राहरुका विषयमा जानकारी गराउनु भएको थियो । हजार रुपैयाँबाट शुरु भएको कारोवार २५औं स्थापना सम्म आइपुग्दा ७२ करोडको हाराहारी सम्म आइपुगेको गर्वको विषय रहेको उहाँले बताउनुभयो । 

कार्यक्रममा उपस्थित सबैलाई स्वागत गर्दै साकोसका उपाध्यक्ष तथा रजत वर्ष मूल समारोह उपसमितिका संयोजक राजाभाई भेलेले रजतवर्षको उपलक्ष्यमा २०७९ असोज २३ गते देखि सुरु भई २०८० मा सम्पन्न गरिने २५औं साधारणसभा सम्मका विविध कार्यक्रम र वार्षिक गतिविधिहरु तालिकाबद्ध प्रस्तुत गर्नुभएको थियो । 

सामूहिक बचत तथा ऋण सहकारी संस्था साविकका ३ वटा संस्था (सामूहिक साकोस, बुद्ध साकोस र समता साकोस) बीच एकीकरण पश्चात एकीकृत सामूहिक साकोस बनेको हो । सोही सन्दर्भमा साविक बुद्ध साकोसको तर्फबाट चन्द्रकुमार तामाङ्गले र साविक समता साकोसको तर्फबाट चन्द्रलाल भोमीले २५औं स्थापना दिवस (रजतवर्ष) सफलताको शुभकामना व्यक्त गर्नुभएको थियो ।
कार्यक्रममा लेखा सुपरिवेक्षण समितिको तर्फबाट नित्यनाथ श्रेष्ठ, साकोसका संस्थापक सदस्यहरु सहित ३८ जनाको उपस्थिति रहेको थियो । नवनिर्मित भवनबाट कारोबार शुभारम्भ गरेकै दिन नव आगन्तुक शेयर सदस्यहरुबाट १६ लाख ४४ हजार ७०० रुपैंया बचत संकलन भएको साकोसले जनाएको छ । साकोसले रजतबर्षको अवसरमा असोज २९ गते निःशुल्क सदस्यता वितरण गरिने जनाएको छ । 

कार्यक्रमको सञ्चालन साकोसका सचिव कृष्णहरि सैंजुले गर्नुभएको थियो ।